الاسرة والطفل

العادة السرية عند الأطفال

كتبت: ياسمين يحيى

إنه فعل يؤدي للإستثارة الذاتية للطفل وبيولد إحساس ممتع، فبشكل طبيعي الطفل بيحب يكرر السلوك أو الفعل ده.
الأطفال يعملوا كده ؟؟؟؟

السلوك ده ممكن يبدأ من سن صغير حتي من سنة أو أقل، ده نادر بس بنشوفه.

لكن أكتر سن بنشوفه فيه من 2 ل 4 سنين.
الموضوع ده أكتر في البنات من الأولاد وده برضوا اللي بنشوفه.

الدراسات بتقول إن نسبه كبيرة منهم بتقف حوالين سن ال 7 سنين.

بيعملها ازاي؟

عن طريق اللمس أو الاحتكاك مع إيده أو أي شيء زي مخده أو طرف الكنبه أو السرير أو حتى الأرض أو عن طريق ضم عضلات الفخذين وقبضها وبسطها بشكل متكرر ….
أثناء ده الطفل بيكون مركز جدا مع الفعل ده ووشه بيحمر وبيعرق وبعدها بيهدى أو ينام.

ليه ده بيحصل؟

. الاستكشاف: وهو العامل الأساسي والأكثر انتشارا، جزء طبيعي في نمو الطفل هو استكشاف كل حاجة حواليه وكل حاجة في جسمه، يلمسها، يشمها، يشد رجله يحطها في بقه .. وهكذا

. التقليد: إن الطفل يكون شاف مشهد وبيقلده، وده بيحصل كتير مش قليل ، بعض الآباء مش بيراعوا الاحتياطات اللازمة لسرية العلاقة بينهم، التلفزيون وكتير من أفلام الكارتون بتحط مشاهد غير مقبولة، إتاحة النت للطفل بلا رقيب بتخلي من السهل يشوف أي حاجة.. في الفترة الأخيرة خاصة ظهرت فيديوهات لأشخاص حقيقيين بيقلدوا شخصيات كارتونية وبيدخلوا فيها سلوكيات كتير غير لائقة بالمرة والخطير انها بيتم ترشيحها تلقائيا للمشاهدة وهو بيتفرج على فيديوهات أطفال.

. الإعتداء: وهو الأخطر، إن يكون شخص ما اعتدى على الطفل يإنه يكون عمل معاه كده أو حتى عمل قدامه وفي كل الأحوال ده إسمه اعتداء جنسي، لأن الطفل غير مدرك للي بيحصل.

. الهرمونات: ودي كلها ما زالت دراسات تحتاج المزيد، وجدوا إن هرمون (الإسترادايول) معدلاته بتكون قليلة في الأطفال اللي بيكرروا العادة دي.

. الإلتهابات مش سبب .. الإلتهابات تعمل حكة أو حرقان لكن ماتعملش حاجة بالوصف السابق.

. مش صرع … البعض بيخلط بينه وبين نوبات الصرع عشان اتخاذ الطفل لوضع غريب وانه بيكون مش مركز معانا وبيحصل انقباض وانبساط لعضلاته وبعدها بينام، وبعض الأطباء بيحط الطفل على أدوية مضادات الصرع وفي الحقيقة مالهاش دور.

ليه الطفل بيكرر ده ؟

. لأنه بيستمتع بده، وطبيعي نكرر الحاجة اللي بتبسطنا ( وده السبب الأساسي)

. إنها أصبحت مجرد عادة ، زي الطفل اللي بيحط صباعه في مناخيره مثلا.

. الشعور بعدم اهتمام الآخرين ومحاولة جذب انتباهم، لأنه لما عملها أول مرة استكشافا وكل اللي حواليه اتخضوا وجريوا وانتبهوا له، فاكتشف ان دي طريقة كويسة يكون بيها محط اهتمام.

. التهدئة الذاتية في حالات القلق والتوتر واضطراب النوم.

فين الخطورة؟

. في الحقيقة الخطورة غالبا مش في الفعل نفسه، الخطورة بشكل أساسي إن يكون الفعل ناتج عن تحرش أو اعتداء جنسي واحنا مش عارفين

. كمان ظن بعض المحيطين إن العادة دي معناها إثارة جنسية زايدة فبيكون الطفل موصوم بشيء سيء، أو يكون ضحية لأحد المعتدين المحتملين في محيط العيلة أو المدرسة.

.الخطورة كمان من رد فعل الأهل الشديد أو العنيف اللي بيترتب عليه أحد حاجتين كلاهما سيء: الأولى .. إن الطفل يهتم بزيادة بهذا التصرف المهم اللي شاغل الأسرة كلها ويكرره، والحاجة التانية .. إنه ينشأ عند الطفل ارتباط سيء أو خوف بكل ما يخص الأعضاء التناسلية حتى لما يكبر .. خاصة أنه مش فاهم الكلام اللي الأهل بيقولوه ده إيه المقصود بيه تحديدا (عيب – كده تتعور وتموت – هتروح النار – كده الميكروب يدخل جسمك – .. إلى آخر الجمل اللي بنسمعها في عياداتنا).

نعمل إيه بقى؟

. أهم حاجة .. مانعملش إيه؟ .. ما نعملش اللي شرحناه في رقم 3 في الفقرة اللي فاتت.

. نهدأ كده، ونبقى عارفين إن استكشاف الطفل لجسمه شيء طبيعي.

. التشتيت هو الحل، لو بدأ يكرر الفعل ده .. التشتيت عن الفعل مع إهمال الفعل نفسه، مش إننا نركز على الفعل ونشد تحته خط، لأن زي ماقلنا ممكن يكون ده هدفه .. جذب الانتباه، ماتجيبش سيرة الفعل .. نادي عليه، أطلب منه يساعدك في حاجة، خلي إيده مشغوله معظم الوقت .. ألعاب ..كورة .. بازل .. صلصال .. مكعبات .. خليه هو كمان مشغول معظم الوقت. المهم ما تسيبهوش في المثلث ده ( فاضي – زهقان – إيده فاضية)

. زود مشاركتك إنت اليومية مع أولادك ، قضي وقت معاهم وشاركهم وقت يومي، خليهم يشبعوا منك.

. إشتراك الطفل في رياضة مهم جدا ومفيد جدا.

. التلفزيون واللاب والتاب إلخ إلخ .. لازم وقتهم يكون محدد، لازم تحت رقابة ومتابعة، حذف القنوات اللي بتعرض محتوى غير مناسب، استخدام محركات بحث خاصة بالأطفال على النت .. واستخدام برامج الحماية… والحاجات دي متوفرة جدا

. أفراد الاسرة كلهم لازم يتعاونوا بنفس الطريقة.

. الوقاية من احتمالية تعرض اطفالنا للتحرش
. تسمية الأعضاء التناسلية بأسماء ثابتة ليها دلالة واضحة عند الطفل والوالدين حاجة مهمة، عشان وانت بتعلمه أو لو الطفل اشتكى لأي سبب تبقى فاهم هو يقصد إيه بالظبط.

امتى نروح لطبيب نفسي أطفال؟

. الطفل بيكرر ده كتير وما بطلش بعد أكتر من شهر من عمل الحاجات اللي فاتت.
. بيعمل ده بطريقة عنيفة أو مؤذية.
. بيعمل ده قدام الناس بشكل متكرر.
. بدأ يعمل ده لحد تاني، أو يطلب من حد يعمل له كده.
. بيعمل ده بطريقة تشككنا إنه شاف أو اتعرض لاعتداء جنسي. (هبقى احط هنا لينك لإمتى تشك إن الطفل تم الاعتداء عليه)
. نروح للطبيب طبعا لو مش قادرين نفرق بينه وبين نوبة الصرع، كتير مننا كأطباء بقينا بنطلب تصوير الطفل فيديو بأي موبايل أثناء نوبة الصرع، دي من الحاجات اللي بتساعد على التشخيص.
. لو انت شخصيا كأب أو أم اتوترت وبدأت تتعصب ومش عارف تتصرف

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.