رأى المواطن

إبني وسائق باص المدرسة

مختارة من صفحة
د. مي عبد السلام

كنت راجعة البيت من مشوار في نفس وقت رجوع ولادي من المدرسة ، فقابلتهم تحت البيت وهما نازلين من الباص ، وسلمت على سواق الباص وإديته وفلوس هي في نظري مبلغ سخيف جداً ، لكن استغربت من رد فعل السواق وهو بيشكرني اوي وتعبيرات وشه كلها امتنان وشويه وعنيه هتدمع…
ولما طلعت البيت مع ولادي ، لاقيت ابني الكبير بيقولي إنه النهاردة بس إيمانه بربنا زاد أضعاف ، لإنه شاف موقف فيه رساله واضحه من ربنا للسواق ده …حكى لي انهم وهما راجعين وقفوا عند عماره ينزلوا بنتين معاهم في الباص ، فأبو البنتين كان واقف قدام البوابه مستنيهم ، وإدى مشرفة الباص ورقة بمبلغ ما ، وتعمد يفرد الورق عشان يوري السواق هو إدى المشرفة كام ، ومرضاش يدي السواق لإنه مره مشي وسابهم بأوامر من إدارة المدرسة لأنهم أخروا الباص مدة طويلة ، فحب يذل السواق ، ولاحظ ابني تأثر السواق…
ملحوظة بس، السواق ده بيعاني كل فترة من مغص كلوي بسبب حصوات بتجيله دايما ، ودة عرفته لما غاب مرة وجه سواق غيره يوصل الولاد ، ولما اتصلت عليه عشان اتطمن عليه وهو ميعرفش نمرتي ، كلمة ألو اللي قالها كانت تشبه آه من ألمه ، لكنه اتدعى انه زي الفل وغير نبرة صوته لما عرف اني ام لاولاد معاه في الباص ، عشان خاف على اكل عيشة لا اقول للمدرسة انه لا يصلح مثلا او مآمنش لولادي مع سواق بيتعب … لكنه في النهايه ادرك اني مش عاوزة حاجة غير السؤال عن احواله …

المهم … طبعا سبب تأثر السواق هو حوجته الشديدة لأي مليم وده اللي نزله يشتغل وهو تعبان وسنه كبير ، لكن اتفاجأ ان بعد ٥ دقايق ربنا بعتله مبلغ اكبر من اللي حب غيره يذله بيه ، ويقوله ان الناس دي مجرد اسباب محدش فيهم يملك ليه او لنفسه حاجة ، انما هو بس الرزاق ، ومش بس السواق اللي فهم اشارة ربنا ، ولادي كمان فهموها ، وده كان سبب امتنان الراجل المبالغ فيه …

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.