الباقه العطرية في اللحمه
كتبت / عزه السيد
الصره القماش دي اللي حضراتكم شايفينها اسمها البوكيه جارنيه يعني ايه الكلمه دي وبنستخدمها ليه⁉️
البوكيه جارنيه ده معناه الباقه العطريه
الباقه العطريه دي مجموعه توابل واعشاب بنحطهم مع بعض ونربطهم ع شكل بوكيه أو ممكن نحطهم في قطعه شاش وتربطها زي الصوره كدا ونضعهم مع أي لحوم بنسلقها أو فراخ او سمك او كوارع أو فشه أو ممبار أو حمام …الخ. بقولكم أي لحوم ف الدنيا
طب لزمته ايه⁉️
البوكيه جارنيه ده بيشيل معايا اي زفاره أو اي ريحه مش مستحبه من اللحوم وبيضيف طعم ونكهة كل الباقه العطريه دي للحوم اللي بنسلقها فبالتالي هيفرق جدا في طعمها ويديها حته تانيه خالص
طب مكوناته ايه. بيتكون من شويه خضار واعشاب وهم كالاتي
بصل ..جزر..كرفس عروق بس مش بتاخد الاوراق عشان بتمرر
روز ماري فريش…زعتر فريش …فصين توم وده اختياري
.
وشويه توابل وهم كالاتي
فلفل اسود حصي ..ورق لورا ..حبهان حصي…قرنفل اربعه مسمار…بهارات كبيبه صيني اللي هيا بهار أسود حلو عند اخواتنا الشوام…عود قرفه خشب..
نربط كل الباقه القمر دي في قماشه عشان يبقا سهل علينا نشيلها منقعدش نجري وراها ف الحله عشان نصطادها
ونحطها اول ما الميه اللي هنسلق فيها اللحوم بتاعتنا تغلي ونسيبها تغلي خمس دقائق وبعدين نضيف اللحوم أو الفراخ بتاعتنا مع الملح طبعا
واوعدكم ب اذن الله هتشربو حبه شوربه م الآخر روعه
