طلع اللى جواك
بقلم / أمل الوكيل
بشوف ناس حواليا كتير متميزين وعندهم حاجات مميزه لو استغلوها صح ، يقدروا يعملوا حاجات رائعه ، بس أغلب الوقت بلاقيهم عارفين كده كويس وعارفين كمان نقطه قوتهم فين بالضبط ويقدروا يعملوا كمان مشاريع ويدخلوا دخل كويس منها جدا . ..وعارفين الطريق والسكه كويس .
طب ايه ؟!
بلاقي الأغلب للأسف ، غرقان في مشاعر معينه ومش عارف يتخلص منها ، أنواع مختلفه بقى من المشاعر
مشاعر بتبقى أغلبها سلبيه ، بيفتكر حاجه بيجيله إكتئاب أو موقف بسيط مش مستاهل يغير موده ويتقلب مزاجه ، أو مثلا بيبقى تايه كده ومش مركز في اللي عاوز يعمله أو ماعندوش طاقه ..يعمل حاجه
طاقته مهدره مع ده وده .
الحاجه الوحيده اللي هطلعه من اللي هوه فيه حتى لو عنده بوادر اكتئاب ، هوه الإنجاز ..
أي إنجاز بسيط ..حاجه بسيطه جدا في اليوم ، تحسى بيها بالإنجاز ،
حاجه نفسك تعمليها من زمان ، إنزلي إعمليها
حاجه نفسك تتعلميها ، إبدئي فيها
حتى لو مجرد تلوين رسمه أو حاجه بسيطه تعمليها في البيت .
إنزلي إسمعي حاجه جديده ، روحي المسجد اللي جنب بيتكم شوفي ييعملوا فيه ايه !؟
إشتركي في عمل تطوعي أو خدمي
إتعرفي على ناس جديده ، لو إصحابك كسلانين ومابيشجعوش على حاجه ، ماتقطعيش علاقتك بيهم بس قلليلها ، قللي الكلام شويه مع الناس اللي بتفضل تشتكي على الفاضيه والمليان .
وأهم حاجه بعد كده هوه إنك تعرفي على الحاجات اللي بتبسطك وبتحسي بيها إنك سعيده وفرحانه
وبعذ كده أول ما هتتطلعي من الدايره المغلقه ديه ، هتبدئي شويه شويه تمشي في الطريق اللي عرفته..
بس في الآخر موضوع إن الواحد يأخد باله من اللي بيضايقه وبيغير موده وبيعكنن يومه ؛ مهم اوي بدل ما الموضوع يفضل يزيد ويزيد وممكن يوصل من مجرد تغيير في المود الى حالة اكتئاب