عن الإنسان (1) عاوز أفهم أولاً.

بقلم / الدكتور أمين رمضان

أي حد بيشتري جهاز جديد .. بيكون حريص إنه يعرف مواصفاته وازاي بيشتغل .. لكن مع الأسف .. كام واحد فينا حاول يفهم نفسه؟!!! .. علشان يشغلها في الحياة حسب مواصفاتها .. بالطريقة المناسبة ليها .. والتي تقوده للنجاح .. قليل جداً .. عالم النفس الأمريكي جريفز (1914-1984) .. قدم للبشرية خدمة عظيمة .. نظرية تساعد على فهم الطبيعة الإنسانية .. يعني إيه؟ .. يعني نفهم بيها “ليه بنعمل اللي بنعمله، بالطريقة اللي بنعملها، وإيه اللي ممكن نعمله بعد كده”.. يعني إيه اللي ممكن نتطور ليه .. الإجابة على السؤال ده .. مفتاح مهم جداً لتطور الإنسان .. وأمل بإن الإنسان بطبيعته .. يقدر يخلي بكرة أفضل من النهاردة .. لأنه عنده الإمكانات الكامنه جواه .. والنقطة دي هتكلم فيها لوحدها بعد كده .. والرحلة دي ما لهاش نهاية .. يعني ما فيش محطة نهائية لنمو وتطور الإنسان .. وده هيفيدنا في حياتنا جداً .. وفي نفس الوقت بشرى علشان الإنسان ما يفقدش الأمل في قدرته على تغيير حياته للأفضل.
مهم قوي أيضاً نعرف إن الكيان الإنساني معقد جدا في تركيبه وتفاصيله .. جريفز زي ما قالوا عنه .. كان سابق لزمانه .. يعني أنتج معرفة علمية عن الإنسان وظروف الحياة المختلفة .. اللي بيعيش فيها .. نورت للبشر فهم الطبيعة الإنسانية بصورة كلية .. وما زالت هذه المعرفة تفسر الظواهر الإنسانية الناتجة من تفاعل الإنسان مع ظروف الحياة المختلفة .. صحيح الصورة الكلية بتحتوي على كتير من التفاصيل .. والتفاصيل مهمة أيضاً .. لكن الفهم الكلي مهم أيضاً .. والاتنين مكملين وداعمين لبعض.
في السلسلة دي هنغوص بعمق أكتر .. لفهم أعمق .. لنتائج أبحاث جريفز العلمية .. ونبسطها .. علشان نفهم ليه الناس بتتصرف بالطريقة اللي بتتصرف بيها .. ونشوف هل ممكن فهم النفس البشرية وحالات وجودها يكون مفيد في التعايش الإنساني الصحي والمفيد؟ .. على المستوى الفردي والاجتماعي .. وإيه اللي ممكن يتصحح في حياتنا الشخصية والاجتماعية؟
آخر نقطة مهمة جداً .. هي إن حديثي ده كله عن الناس الأصحاء فقط .. أما المرضي .. فمكانهم الأطباء والمتخصصين في فروع الطب المختلفة .. لإن أبحاث جريفز كانت على الناس الصحاء البالغين فقط.
إيه اللي خلا جريفز يبدأ رحلة البحث؟ .. إنه كان عاوز يفهم الناس بعد ما شاف التناقض أحيانا في المعرفة العلمية المتاحة في عصرة.
وللحديث بقية بإذن الله…
أمين رمضان
10 نوفمبر 2021