كلام ستات وشوية تكات
كتبت / عزه السيد
كل مااسال اهل الخبرة والناس العقلانيه دايما يقولو وفري ودبري لو جنيه اوعي تستهوني بالنص جنيه والربع فيه ناس طلعت عمرة من تحويش البريزة والشلن
وستات جابت اجهزة جديدة وجددت في شقتها من التحويش والله
وياما ستات جابت دهب من تحويش الفكة وتحافظ على الاكل حتى لو اكلو الاكل يومين مش مهم واتبقى تشيله في فريزر مرة ع مرة هيبقي ف كذا صنف لماتشتاقي له تاني طلعيه وسخني ويبقي اجمل اوبن بوفيه
اوعي تستهوني انك تدوري عشان تجيبي الحاجات الارخص ولو 5جنيه ارخص انتي اولى بيها انتي وعيالك وبيتك في الشهر حيبقى 150جنيه في السنه حيبقو 2000جنيه تجيبيي بيهم اي حاجه محتاجها وتفرحي بيها
فيه ناس تقدر تمشي يوم بيومه عشان تمسك ايدها مش مشكلة فعلا اعملي كدة عشان متصرفيش كتير وبعدين تلاقي نفسك اخر الشهر مفيش فلوس
فيه ناس بتجيب حاجات الشهر وبتخزن نوع سلعه معينه كل شهر خزين مسحوق او خزين بصل او خزين بطاطس او نوع خضار او نوع فاكهه لاعصير او زيت او مكرونة او رز اي نوع خزين حيبقى انجاز حتى لو حتخزني ملح هتستفادي حتى لو فول وتشيليه هينفع في يوم فطار او غدا
وكل واحد ع اد ظروفه
الخروجات مهمه عشان نفسية العيال ونفسيتنا بس نتفق مع العيال اننا لينا حاجة واحدة بس وللاسف لازم تقعدي بعدها بكام يوم متقشفة شوية اكل عادي مش غالي عشان تعوضي اليوم الخروجة اللي صرفته فيه كتير
الاهتمام بنفسنا حتى لو بارفان تركيب حتى لو كريم ايد او بيجامه بسيطة تغير من نفسيتنا مش هنفرح بالتحويش وبنلبس وحش نلبس حلو حتى لو طقم غالي ونحافظ غليه ونظهر بيه مظهر حلو ونعتني ببشرتنا بحاجات طبيعيه
نحاول نعمل الاكل اللي برة في البيت ولو تعبتي في يوم هاتي اكل من برة عشان متتعبيش لان الفلوس اتعملت لكدة عشان لمانتعبت نرتاح
اقول مرة كمان كل بيت وظروفه
الست اللي بتيجي عشان تساعدنا في تنضيف البيت مهمه ودورها مهم لانها بتعرف تنضف اسرع مننا وبتريح بس اغلبهم معندهمش ضمير وبيتدخلو في حياتك وبيطلبو فلوس كتير الا من رحم ربي عشان كدة لاتضطري تجيبي حد ينضف الا لماتكوني تعبانه اوي وفعلا الدنيا اتهبدلت اوي
واقول مرة كمان كل بيت وظروفه
اوعي تستخسري في علاجك والحقي اي حاجة او تعب في اوله متستنيش لحد اما تتضاعف ونلاقي نفسنا بنعالحها بعمليات ربنا يسلمكم ويحفظكم
اوعي تستخسري في تعليم العيال لغه ويتقنوها او درس عشان يفهمو مادة صعبه عليهم او علم معين او في تحفظيهم للقران او تعليم امور دينهم كل دة في ميزان حسناتك وصدقة جارية ليكي ولانهم ولد صالح يدعو لك خليكي ذكية واتعلمي التجارة مع الله ربنا يرزقنا بر ابنائنا واصلح حالهم يارب
مش عيب لو اكلنا كمية لحوم قليلة الجسم مش محتاج لحوم الا قطعةصغيرة على اد علبة كبريت صغيرة
العدس بروتين قوي في الكشري او عدس اصفر او بتنجان في مسقعه
رغم أن الحمد لله بردوا الحاجات دي غليت بس هقول كمان كل بيت وظروفه
فيه افكار كتيييير للربع لحمه مفروم تعملي بيهم مكرونة بلحمه مفرومه او مكرونة باشاميل او 6رغيف من حواوشي الربع بانيه بيرمي 6قطع متوسطين وبيكفي يوم
معلش الظروف اليومين دول علمتنا التوفير لو مش برضنا غصب عننا وربنا المستعان بقااا
وممكن شكشوكة البيض واابطاطس مهمين في البيت والجبنه وعجينة الطعميه والبتنجان واافلفل عشان نعمل اكلات بدون لحوم
الفاكهه مهمه جدا بس ممكن كيلو او 2 من كل نوع ونقسمهم في اطباق كل فرد في العيلة حيلاقي نفسه معاه طبق فيه كل انواع الفاكهه
انا مش بجبر حد على التحويش او البخل والله ازمة التعويم والأزمة الاقتصادية علمتنا اننا ياريتنا حوشنا وادخرننا فلوس ولو بسيطة عشان علاج او عشان الازواج الا قعدت من شغلها أو مرتبها بقا ف ظل الايام دي مش بيعمل حاجة او نصرف في فيتامينات اوحاجات رمضان او لبس عيد وربنا يوسع علينا جميعا يارب
