كلام ستات وشوية تكات

كتبت / عزه السيد

كلام مفيد

سمعت نصيحه ست كبيره في السن
قالتلي خديها نصيحه هتبعد عنك اي اذي باذن الله حطي مع غسيلك شويه ملح وهتشوفي السعاده الهتبقي فيها وبيتك وحياتك هتتغير ازاي

وغسيل الشتا لما تلميه من ع الحبال بيكون ساقع ودا راجع للندي اللي في الجو فلازم لما نلمه نسيبه شويه قبل تطبيقه ودخوله الدولاب عشان مايعملش ريحه

وقبل ما تحطي غسيل في الغساله اقلبيه ع ظهره

انقعي الملابس البيضه ليله أو حتي ساعتين تلاته هتفرق جدا في النظافه وهتشيل اي بقع

لو عندك جينزات جديده قبل ماتغسليها انقعيها الاول في مياه بخل عشان تثبت لونها

لو في زراير في فستان او حاجه افتحيها قبل ماتغسليه عشان فتحات الزارير ماتوسعش

لو عندك هدوم بيبي صغير جمعيهم واغسليهم لوحده مش مع غسيلكم لأن بشرته حساسه فنحافظ عليها علي قد ما نقدر

– وقالتلى كمان ملح الليمون وبيكربونات بتأثر سلبا علي عمر الغسالة.-ممنوع منعا باتا مسحوق عادى مع الاوتوماتيك.

-كنت أنا بجري بالتايمر كدة حذرتنى جدا من الحركة دى وقالي تمشي تكة تكة..

-بلاش زيادة المسحوق مش بينضف ده بيعمل مع الوقت تحميل ع الاكس . كوب إلا ربع كفايه جدا

-غلط الخل بكثرة.. لانى كنت بحط منه مع المسحوق.. قالى الحمض ده لو كل شوية بتأثر ف الحلة.

-بعد الغسلة تنشفى الاطار الكاوتش إللى جوة ده بالراحة جدا..

-ولما تيجي تخرجي الهدوم متشيديهاش كدة زى ما بنعمل لاء حطى ايدك تحت على الكاوتش ده ومن فوقها بقى شدى الهدوم.

-قالتلى كمان تفتشي كويس اوى ف الهدوم حتى لو اكسسوار ولا دبوس ممكن يخرم الكاوتش.

-شرابات الاطفال والعادية كمان تشترى الكيس بتاعهم لانه بيقولى كتير بيدخل بين الحلتين عند ناس كتير وتتعطل الغسالة برضة.

-بعد ما تخلصي هويها سيبيها مفتوحة عشر دقايق بس لو فى اطفال بلااااش

-دورة الخل بقى دى كل 6 شهور.

-كثرة الداونى والمنعمات والمعطرات بتعمل على المدى البعيد ريحة وحشة جدااا ف الغسالة

-ممنوع تشغيل الغسالة أثناء النوم أو واحنا برة..علشان لما الميه تقل.. او تقطع .. ده غلط غلط.

-الغسيل عموما لو يوم مرتين يبقى إللى بعده مرة بس. يعنى غسلتين ف يوم واليوم إللى بعده غسلة واحدة. ولما تمليها افتحي ايدك شبر فوق الغسيل يبقى فاضي

-دورة الخل زجاجة كاملة خل فى درج المسحوق ونشغلها علي 90 درجة. ودة كل 6 شهور.