أراء وقراءات
ليه المطر نازل حزين؟
ليه المطر…
نازل حزين
شايل هموم المظلومين
صوته اللي كان بيشجينا
أصبح أنين
خايف على بيوت الغلابة
تتهدم
خايف على الناس اللي مش عايشة
وعايشة في العدم
خايف على حفر النفوس
قبل ما تتردم
خايف يدمر حلم أم في ابنها
أو بنتها
خايف يزَوِّد همها
خايف يا ناس
يصبح سيول
ويجرف عضمها
هو مطر ولا دموع؟
اسألوا كل السحب
لما السما تبكي على موت الضمير
تبعت دموعها
من ألمها وحزنها
حزنها المدفون في بير
يمكن يكون طهر المطر
هو الدوا
اللي يطهر ناسها
ويطهر أرضها