أراء وقراءات

من القلب للقلب .. انطباعات

بقلم / أمل الوكيل

 

 

 

مش بسهوله بنعرف ناخد إنطباعتنا عن الناس على حقيقتهم ،

بنكَوِّن إنطباعات بالصور اللي عايزين نشوفهم بيها ، بناخد منهم قشور ، إنطباعات مبدئية بسيطه جداً من ملامح من استايل عام من رأي في موضوع

.. وبنكمل إحنا الباقي كله على مزاجنا

ويا بنطلعهم سابع سما يا بنزلهم سابع أرض !

 

 

إنك تبقى مرتاح او مش مرتاح كإنطباع أولي قبل أي حاجة و إن الأرواح تحس بقبول أو تنافر .. ده راجع لدرجة شفافيه وده محتاجه نوع من البصيرة يعني ميبقاش غالب على إحساسك ظنون ومخاوف في عقلك الباطن وتعتقد إنه تنافر أرواح

 

 

الإنطباعات مش بالساهل .. محتاجه مواقف وتفاصيل و وعي وبصيرة و فصل بين إنت عايز إيه وبين إنت شايف إيه ، لو حريصين على إنطباع سليم .. غير كده بيبقى وهم ..

وبيتبني عليه قرارات ..

وبعدها بنتفاجئ إننا مكناش نعرف عنهم حاجه ، ونتهمهم كمان بالتغيير ..

 

والحكاية وما فيها إنك لسه مابتبقاش شفتهم أصلاً بحقيقتهم هم ولا تعرفهم لحد دلوقتي !

 

ياما ناس خسروا ناس ملحقوش يشوفوا جمالهم ، وناس تانيه قربوا منهم ناس كان لازم يكون بينهم مسافات ..

كل ده بسبب الإنطباعات اللي بنتسرع وبنحكم بيها على مزاجنا ..

 

(إننا نحاول دوماً تفسير الأمور وفق ما نريد، لا وفق ما هي عليه)

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.