أراء وقراءات

من القلب للقلب…قلة عقل

كتبت : أمل الوكيل

زمان اوي الناس كانت فاكره ان القمر مضيء و شكله دائري وانهم شايفينه كامل وشايفين حقيقته كامله .. ومع الوقت العلم و الفهم كشفوا الحقيقه الصادمه .. وإن القمر اصلا مش مضيء هو بس جزء منه بيعكس ضوء الشمس وفي جزء معتم تماما من القمر .. و انه في الحقيقه كروي الشكل .. سطحه معرج.. مليان حفر .. و مشاكل .. ادركوا حقيقه ان الي شايفينه جزء بسيط من الواقع .. جزء بسيط اوي من الحقيقه..
الحقيقه الي خادعه نسبيا .. لانه كمان مش منور.

كل حد فينا عنده جانب مضيء زي القمر.. مميزات حلوه .. واضحه و منوره ..
نجاحات … اولاد … صحه … شهره .. حاجات كتير اوي ممكن تكون موجودة وواضحه .. بس برضو كل واحد عنده جانب مظلم .. معتم .. حته واجعاه …
شوكه في ضهره و هو ماشي .. و ماشي بيها ..
الفرق بقى : إن في ناس بتختار تتكلم عن الجانب المعتم ده و تشاركه الناس .. و في ناس اختارت تفضل تسيبه معتم و مظلم و مجهول للناس.. هل معني كده انه مش موجود ؟؟ أبدا !

  • مثلا : اعرف واحده كانت منوره .. متالقه .. تحب الناس تشوف الجانب المضيء عندها بس.. و كانت بيتقالها طول الوقت .. يا سعادتك .. يا جمالك .. يا خروجاتك.. يا سفرياتك .. وهي اصلا كانت مش قادره تتنفس… كان بيدخلها هوا اقل من ٤٠٪؜ من الي المفروض يدخل للجسم .. بتكافح عشان نسمه الهوا تدخل جسمها !

مره قلتلها اما حد يقولك كده .. قوليله اتفضل سافر و هات ٦٠٪؜ من الهوا الي بتتنفسه! بس هي ماقلتش.. فضلت طول الوقت انها تخلي الجانب المضيء هو الي باين..

بنتي اما بتيجي تحكي لي علي حد مشهور و منبهرة باي حاجه حلوه في حياته ..
بقولها : الله تحفه؟ بس ياتري فين باقي القصه؟ ايه الجزء الحزين عنده؟
طبعا بتتنح لي و رايها اني نكديه و دمي تقيل .. بس دي حقيقه .. مش قادره انبهر بجزء مضيء من حياه حد .. لأني في ساعتها بكون شايفه و حاسه بالجانب المعتم .. و كتير ببقي خايفه منه .. لأني معرفوش… و الأهم اني بحمد ربنا اني مش هو ..لان اذا كانت الحته دي مش عندي يبقي هي مش بتاعتي .. يبقي ببساطه انا مش قدها!

الخلاصة : جزء من النضج .. ان الواحد ما يتمناش حياه غيره ..و لا ينبهر بأنوار غيره .. لانه حقيقي لايمكن كان يقدر يستحمل ظلماتهم او عتمتهم
عارفين المثل بتاع الي يشوف بلاوي الناس تهون عليه بلوته… طب و البلوه الي مش باينه ؟ موجودة والله .. انت بس الي مش عارفها ! ليه اما محمد صلاح راح المالديف الناس كانت فرحانه من قلبها ! كانهم هما الي سافروا ؟ لان صلاح في جزء من الالم الي في حياته الناس عارفاه و حست بيه.. كفاحه في البدايه .. قعدته علي الدكه في تشيلسي .. و إحباطه مع المنتخب في كاس العالم … اما بتكون عارف القصه كامله بتتعاطف.. بتقدر .. بتحس .. و بتفهم ..

هل لازم تعرف قصص الناس؟ لا .. هل لازم تدور علي الجانب المعتم و تعرفه؟ لا .. بس أرجوك أتأكد ان في كل قصه .. في حياه كل إنسان مش معني إنكم مش شايفين الالم انه مش موجود!

انا بقول الكلام ده ليه

بس لأني اكتشفت ان ناس كتير اوي بيتقالها كلام سخيف و غريب ! انتي حياتك سهله ! انتي دنيتك بسيطه ! انتي مالك انتي ده انتي بتعملي الي نفسك فيه ! انتي ظروفك مساعداكي .. و ياريت ظروفنا زيك! انتي حياتك سعيده !

الكلام ده لا يصنف الا تحت كلمه واحده
قله..
قله عقل ..
قله رضا..
قله ايمان بحكمه الله ..

قله عقل ان حد يحكم علي حياه حد لانه بيضحك في الصورة !
قله عقل ان حد يتخيل أن في حد حياته كلها ببساطه .. سعيده !!
قله عقل انك تتخيل انك في الدنيا و أشخاص تانين علي الارض عايشين في الجنه !
قله عقل ان حد يحكم علي حياه حد من الجانب المضيء بس

مقالات ذات صلة

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.