أجمل مارأت عينى
بقلم / أمل الوكيل
انا اسمى أمل الوكيل عندى محل ميكب واكسسوارات هو فى منطقة شعبية شوية
بس يعتبر ارقى محل فى المكان ده
ساعات الناس بتخاف تدخل فاكرين اسعارى عالية
لكن اللى بيحصل من الناس خلانى استغرب شوية
مثلا النهاردة دخل ولد اصم لا يتكلم بسيط جدا ظاهر عليه الشقى بكل تفاصيله لابس بنطلون خفيف ف عز البرد فضل يشاورلى والله كنت فاهمة كل كلمة عاوز يقولها
كان بيقولى انه عاوز اشيك هدية لمراته الجميل انه فضلها عليه زى مابقولكم كده تعبان وبردان بس هى اهم
كنت ف قمة سعادتى وانا بساهم معاه ف هديته علشان اشوف فرحته انه جاب احلى حاجة
بعد شوية دخل رجل اربعينى شايل ف ايده مبخرة طلب منى يبخر المحل قلتله ماشى
طبعا لف كتير والبخور طبعا مش اللى هيخليه يقدر يعيش ف الزمن ده المهم بعد مابخر لم الفلوس كلها عبارة عن خمسين جنيه من شقى يوم كامل ولقيته بيقولى ممكن تخدى الفلوس ده وتحيبى سلسلة لام العيال .عاوزة اقوله ايه ياعم روح اكل ولادك بيهم بس الغريبة انه فاهم اكتر منى الدنيا علمته ان الحنية اهم وان شريكة حياته لازم تلاقى اللى يحن عليها علشان واقفة حنبه طبعا انا قعدت نص ساعة مبتسمة من الناس الحلوة ده ف وسط زحمة من الشياطين
الخلاصة /بالرغم من إن حياتنا كلها بقت قتل وضرب وطلاق الا ان فيه حنية ومودة ورحمة الناس بتدارى فيهم من قسوة الفقر
أمل الوكيل
