أراء وقراءات
أخر أشعة الشمس
آخر أشعة شمس
بتودع العشاق
المجروحين القلب
والغارقنين أشواق
وانتي
يا مدينتي
تايهة مع الأمواج
واللوحة ألوانها
شباب في لون الورد
الدنيا قدامه
مش هي أحلامه
أحلامه مشلولة
من أمنا الغولة
ضفايرها مغزولة
أحلام من الملايين
بتلم فيهم لم
وتسيب مكانهم هم
خلا هدير الموج
حب وغزل وأنين
بيدوب العاشقين
في بحر م الأوهام
لما تعود تاني
الشمس وتلاقي
في عيوننا دمعة حزن
وقلوبنا مكسورة
مخنوقة بالأحلام
وتايهة في الأيام
لا الشمس بتوقف
يوم حضنها الدافي
عن ضمة العاشقين
ولا ميتك يا بحر
تتعب من الملايين
يقولولها أحلامهم
يرمولها أوهامهم
لما الحقيقة تبان
في سكة العاشقين
شعر الدكتور /أمين رمضان
٢٥ نوفمبر ٢٠١٨
