الفن والثقافة
.. أمي
ما لقتش زيك في البشر
كل اللي قال بيحبني
بس ادعاء
انتي الوحيدة
اللي حبك م السماء
ينزل مطر طاهر برئ
مليان نقاء
يروي لي قلبي بميته
يروي لي روحي بالدَفا
عند التعب أو الغضب
أشرب شوية حب
من قلبك
واشعر بالشفا
آه يا أمي…
شفنا حبك
نهر جاري م الحنان
كان بيدينا الأمان
مع كل طلة شمس
تصحي قبلنا
تصحي وهمك أكلنا
ناكل وتاكلي بعدنا
فين كلمتك
لما إحنا ناكل
انتي كنتي تشبعي
كنا جواكي بجد
مش بس بحروف الكلام
عمر الكلام ما يعوضك
أنا شعري خجلان يتكتب
بعدك لحد
خايف على روح القصيدة
تتجرح
خايف من الحب المزيف
يطعن الأبيات
بخنجر من ظنون
خايف من لحظة جنون
تنتحر فيها القصيدة
كل البشر كانت عنيدة
إلا إنتي
كان وجودك حاجة تانية
نور في ليلنا يتشرب
راحة من كل التعب
