أنا المرأة الحديدية
من اختيارات / عزة السيد
اوعي تقولي انا ست بيت !!
اللي يسألك بتشتغلي ايه وانتي مابتشتغليش… اوعي تردي تقولي انا ست بيت
مالك انتي ومال ست البيت يا ست انتي
ست البيت يعني ست متستتة وعلي يمينها الخدم وعلي شمالها الحشم
والمحمر والمشمر بيجوا لغاية عندها وهي ناقعة رجلها في املاح الباديكير وبتعمل ايدها مانيكير
انما انتي بقي لما تتسألي تردي تقولي.. انا امرأة متعددة المواهب و7 صنايع
انا (الشيف) اللي بعمل جميع انواع الحلو والحادق والعصائر والساقع والسخن وولادي وجوزي مايعرفوش ياكلوا الا من ايدي
انا (الدكتورة) اللي اول ما حد من ولادي يتعب اعرف امتي ادي المضاد الحيوي وامتي الخافض وامتي دواء الامساك والاسهال بخلاف الكحة والرشح والبرد واسهر عليهم لغاية مايخفوا
انا (الحارس الخصوصي والموصلاتي) توصيل الاولاد لجميع انواع المشاوير من مدارس ودروس وتمارين مع ضمان الرعاية التامة الآمنة
انا (عاملة النظافة) اقوم بجميع اعمال نظافة المنزل اي وقت خلال اليوم من كنس ومسح وغسيل وخلافه… بالاضافة للمواعين اللي بتتكاثر اسرع من النمو السكاني لمصر
انا (المدرسة)اقوم بمذاكرة جميع المواد الدراسية لجميع المراحل واساعد في عمل الهوم ورك والتسميع وترتيب الجدول والضرب بالشبشب يوميا… بل واقوم بحفظ المنهج اسرع واشطر من ولادي وبحل كل الامتحانات صح
انا (وزيرة المالية) اصرف وادبر واحوش وادخل جمعيات واوزع العصافير قصدي (الفلوس) كلٌ في مكانه
انا (المصلحة الاجتماعية) اقوم بفض جميع انواع المنازعات وحل المشكلات التي تحدث يوميا علي مدار الساعة بين الاولاد واقوم ايضا بشد شعري بعد الانتهاء من كل خناقة تافهة
انا (الموظفة المثالية) اصحى من الفجر اجهز ولادي للمدرسة واحضر الساندويتشات وألبسهم واوصلهم لمدرستهم واطلع اجري على شغلي انجزه على اكمل وجه ووفقًا لارضاء الله ولضميري… ثم اخرج اجري اجيب الولاد من المدرسة واجهز الغداء استعدادًا لمعركة المذاكرة فيما بعد.
ولو سألوكي
ولو سألوكي عن المرتب… قوليلهم اعمل اكبر عدد ساعات عمل ممكنة بدون اي مقابل مادي
ولو سألوكي عن الحوافز… قوليلهم نظرة الاستمتاع والشبع في عيونهم باي اكلة من ايدي هي حوافزي…
نجاحهم ودرجاتهم الحلوة وتفوقهم… هي حوافزي
نضافتهم وريحتهم الحلوة وجمال مظهرهم… هي حوافزي
مريضهم حين يشفى… هي حوافزي
الحاجة اللي نفسهم فيها وبيجبوها من التحويشة ويفرحوا بيها… هي حوافزي
فرحتهم بتحقيق انجاز في التمرين… هي حوافزي…
اوعي بعد كده تقولي انا ست بيت… قولي انا (المرأة الحديدية)
