إمتى نكون حلويين ؟

بقلم الدكتورة /نادية حجازي نعمان

حلويين لما أخلاقنا وتعاملاتنا وسط الناس تكون حلوة …. حلويين لما نفرح لقلب إنسان قلنا له إننا إفتكرناه فى دُعانا النهاردة وإننا فرحانين لوجوده فى حياتنا فيضحك من كل قلبه … حلويين لما نقعد نسمع مشكلة إنسان بكل إهتمام ونراضي قلبه ونطمنه ونحسسه إن الدنيا بخير….حلويين لما نقعد وسط ناس ونقول كلام جميل.
ممكن يكونوا سمعوه من غيرنا ولكن إخلاصنا وإحنا بنقوله
كان سر إنه أثر فى قلوبهم وأسعدهم …حلويين
لما نبعت رسالة أو نتصل بشخص ونقوله كلام
جميل من قلبنا يخلى قلبه يطير من الفرحة …حلويين لما
نجبر بخاطر إنسان فى وقت شدة ….فى عز ما إحنا محتاجين اللى يقف جنبنا ويجبر بخاطرنا

حلويين لما نحس إننا ضايقنا حد فنقول له
” آسفين ، حقك علينا ، ماقصدناش نزعلك ”

حلوين لما نخاف على حد من الحزن ونخاف على قلبه إنه يدوق لحظة إنكسار
فنكون قوته فى عز ضعفه ونقف جنبه نشد أزره
حلويين لما نعمل ذنب فنتوضي ونصلي ركعتين بنية إن ربنا يغفرلنا …
هل إحنا حلويين؟؟؟؟