إنت غنى باللى معاك

حكايه اعجبتني

– زمان وأنا فى إبتدائى ..
أمى كانت لازم تخلينى أفطر كويس قوى قبل ما أنزل من البيت .. وده كان مشكلة كبيرة لي تعلمت بسببها أعظم درس فى حياتى ..

– ساعة الفُسحة ..
كنت ألاقى زميلى اللى جنبى طلع ساندوتشاته وبيأكلها وهو مستمتع بيها جداً جداً ..
وأنا أطلع ساندوتشاتى ألاقيها باردة ومالهاش طعم وماتفتحش النِفس ..
أقوم شايلها زى ماهى فى الشنطة وأقعد متضايق .. وفضلت على الحال ده كتير ..
– لغاية ما فى يوم جات مُدرسة مستحيل أقدر أنساها ..
كانت بتتكلم مع كل واحد فينا كأننا كبار .. ودايماً مبتسمة، وبتعاملنا زى ما تكون أم لكل طفل فى الفصل ..
المهم فى يوم كنت قاعد فى الفسحة متضايق وشافتنى المُدرسة دى ..
جات وقالتلى مالك قاعد لوحدك ليه ؟؟ انت مامعكش ساندوتشات تأكلها زى زميلك اللى جنبك؟؟
قولتلها معايا بس أنا ساندوتشاتى مش حلوة زى ساندوتشاته ..
قامت المدرسة قالت لى يعنى انت نِفسك تبدل مع زميلك ..
بصيت لها بكل سعاده وانا بقولها .. “ياريت” ..
قالتلى ماشى ..
راحت المدرسة وأقنعت زميلى إنه يبدل معايا ساندوتشاته ..
بالفعل زميلى وافق ..
لكن ساعتها حصلت حاجة غريبة جداً ..
لما جيت اكلت ساندوتشات زميلى ، لاقيتها عادية برضه ومالهاش طعم مش زى ما كنت فاكر ..
المُدرسة لما لاقيتنى سيبت السندوتشات تانى ..
– قالت لى :
انا حبيت أثبت لك إن العيب مش فى الساندوتش اللى معاك .. العيب جواك أنت .. أيوه جواك أنت ..

– طول ما أنت شبعان .. مستحيل تحس بنعمة الساندوتش اللى معاك ..وتلاقى مُتعة لما تاكله ..
زميلك علشان بيأكل وهو جعان فعلاً .. بيلاقى الأكل حلو جداً .. وأنت بتلاحظ إنه مستمتع قوى بأكله ..

عزيزى ..
مستحيل تحس بقيمة النعمة اللى معاك طول ما أنت مش حاسس بقيمتها .. هاتفضل طول حياتك عايش فى تعاسة .. وفاكر إن كل الناس معاهم حاجات أحسن منك .. وأنت الوحيد المظلوم .. وتعيش فى عتاب شديد مع نفسك وفاكر إنك مظلوم ..

صدقنى ..
لو بدلت حياتك مع حد ..ساعتها هتعرف انك في نعمة مش عند حد
بنعترف بقيمة النعمة اللى معانا .. لما نتحرم منها ..
انت ..غنى.. باللى معاك ..
أذكر الله.
وقول دائما الحمد لله رب العالمين

من قراءات/ عزه السيد