ارشادات مهمة بخصوص ارتداء الكمامة
كتب/دكتور محمد علي يوسف.
بعد عودة الاهتمام بالكمامات سواء بسبب الغرامة أو بسبب انتباه الناس لزيادة الأعداد وكمان بعد الأدلة العلمية الجديدة أن الماسكات تحد بشكل كبير من انتشار فيروس كورونا وطبعا مع المهازل الحالية في التعامل مع #الكمامات وابتكار مهازل جديدة فمن باب التوعية أعيد نشر هذه النقاط التي كتبتها بأسلوب مبسط ومفصل وأرجو نشرها قدر الوسع حتى لو بدون نسبتها لي ليعم النفع
معلش حاول تقراها للآخر لأنها متعلقة بممارسة أصبحت يومية وضرورية ولازم تكون واضحة تماما
الكمامة زي ما هي وسيلة حماية ممكن جدا تتحول لسبب مباشر لنقل المرض لو لم يتم التعامل معها بشكل صحيح
- الكمامة شيء شخصي تماما مش مفروض تسلفها لحد ولا ينفع تتشارك فيها مع الأسرة والمجتمع والناس!
ومش جدعنة ولا حاجة لما تلاقي شخص محتاجها في مصلحة رافضة دخولها بدونها تقوم شايلها من على وشك ومديهاله إنت كدة ممكن تكون بتضره وبتضر نفسك طبعا لو استرديتها
عاوز تتجدعن وتعمل خير خلي معاك كمامات احتياطي جديدة واهديها للي محتاجها طبعا من باب أولى من النقطة السابقة إن الكمامة مش بتتأجر… الكمامة مش بتتأجر والله يا اخواننا… أقولها تاني. الكمامة مش بتتأجرررررر
واللي بيأجروها للناس فهؤلاء سواء فاهمين أو مش فاهمين فهم بيعملوا جريمة مكتملة. أما اللي بيجمعوها من الشارع ويغسلوها ويعيدوا بيعها فهؤلاء لا أجد لهم صفة مناسبة تعبر عن جريمتهمبحسب النقطة السابقة فممكن حضرتك تكون شريك في الجريمة بدون قصد لأنك مصمم ترمي كمامتك المستعملة في الشارع.
الكمامات على الأرض بقت أكثر من أعقاب السجائر؛ فأرجوك أرجوك أرجوك بلاش ترميها في الشارع
احنا في عياداتنا بنتخلص من الحاجات دي في أكياس حمراء وبتروح المحرقة المخصصة للنفايات الملوثة ومش هاطلب منك ده بس على الأقل ارميها في سلة قمامة أو كيس مغلق
وقبل ما ترميها يا ريت تقطع الشريط المطاطي عشان تصعب شوية إعادة استعمالها لأن كل ليلة بنشوف النباشين مش مقصرين خالص الصراحة 😭
بالمناسبة حسب كلام منظمة الصحة العالمية حضرتك لو شخص معافى فانت مش محتاج تلبس ماسك طبي غالي الا في حالة انك هتخالط او تعتني بشخص عنده احتمالية انه مصاب بفيروس كرونا
وحسب كلام مركز السيطرة على الامراض والوقاية منها CDC الامريكي
فالمطلوب من حضرتك تلبس غطاء قماشي مش ماسك طبي في حالة انك هتختلط بالناس في الاماكن العامة زي البقالات .. وميلبسهاش طفل اقل من سنتين او اي شخص غير قادر على انه يقلعها بنفسه وكمان ممنوع يلبسها اي حد عنده اي مشاكل في التنفس او شخص مش في وعيه
وبتقول كمان إن لبس الغطا ده لحماية الاشخاص اللي قدامك منك مش حماية نفسك في حالة لو احتمال ان حضرتك مصاب
يبقى أهم منظمتين عالميتين بيقولو بالحرف الاشخاص الطبيعين ميلبسوش ماسكات طبية غالية وأن القماشية تكفي عموم الناس و ممكن تستعمل للوقاية الجماعية يعني لو كل المجتمع ارتداها فالرذاذ مش هينتشر وبالتالي العدوى تقلطيب بالنسبة للكمامات القماش حاول تكون كمامتك القماش عدة طبقات وليست طبقة واحدة ولو قدرن تحط بين الطبقتين طبقة من منديل ورقي مقوى أو طبقتين منديل عادي هيكون شيء كويس وأول ما ترجع من الخروج تغسلها كويس بالماء والصابون
ودي طريقة عمل كمامة قماش منزلية
https://www.cdc.gov/coronavirus/2019-ncov/prevent-getting-sick/diy-cloth-face-coverings.html
البعض يرى فائدة لكيها بمكواة حرارية لكن بصراحة شايف تجفيفها في الشمس كافي ولو بتنزل كتير يكون معك اكثر من واحدة تبدل بينهم كل يوم زي الجوارب (الشرابات)
خلاص لازم تعتبر الكمامة القماشية جزء من ملابسك اليوميةالماسك الجراحي الأشهر فيه منه حاليا مضروب كتير فحاول جاهدا لو مضطر ترتديه لتعاملك مع مصاب مؤكد أو لو انت نفسك عندك أعراض إن الماسك يكون من مصدر موثوق عشان نقطة إعادة التدوير بالذات وعند شرائك له افحصه وانظر كم طبقة لو مش 3 طبقات يستحسن ما تجيبوش والماسك الجراحي السليم مش بيكون متخيط بل يكون بالكبس الحراري وبيكون جهة ملونة وجهة بيضاء = خلي البيضاء ناحية وجهك أنت
وده لينك فيديو لاختبارات الماسك الجراحي
https://www.straitstimes.com/videos/what-is-a-good-quality-face-mask/6138961261001
كمان الماسك الجراحي يفضل يستعمل يوم واحد فقط على الأكثر لو لم يترطب أو يتمزق فإن ابتل أو ترطب = تخلص منه فورا
- الماسكات عالية الكفاءة زي n95 و ffp3 و ffp2 بفلتر أو بدون = كويسة طبعا بس استعمالها أولى للي هيخالط مرضى أو بيتعامل مع رذاذ مباشر زي مهنتنا كأطباء أسنان أو أطباء في مستشفيات العزل والتعامل المباشر مع مرضى إيجابيين فلو حضرتك مش من هؤلاء فانت مش مضطر تدفع فلوس كتير في الماسكات الغالية دي
الكمامات مهمة وبقالنا مدة بنطالب بتعميمها لأن فايدتها الرئيسية إن الكل يلبسها لكن هذا لا يغني عن وجود المسافة الآمنة من متر ونص ل 2 متر. يعني مش معنى إنك لابس كمامة إنك تقضيها خروج وفسح وتواجد في أماكن مغلقة بدون ضرورة وتمشي تعانق هذا وتهمس في أذن ذاك خصوصا إنك لو كملت المقال لحد دلوقتي هتفهم إن الكمامات القماش والجراحية حماية للناس منك في المقام الأول فكمل حماية نفسك بالتباعد
الكمامة لو لم يتم التعامل معها بشكل صحيح بتدي إحساس زائف بالأمان وده زي ما قلت في أول نقطة ممكن يؤدي لانتقال المرض بدلا من الوقاية منه فعشان كدة هتلاقي في الصور المرفقة في التعليقات طرق التعامل معها وهي باختصار وتبسيط تأكد من غسل يدك وتطهيرها جيدا ثم ثبت الكمامة بربطها خلف رأسك أو وضع المطاط خلف أذنيك ثم تأكد من وضع الكمامة على وجهك واضغط الدعامة على أعلى أنفك إن كانت كمامة بدعامة وتأكد أن الأنف والفم مغطيان بالكامل
بعد كدة لا تلمس الكمامة من الجزء الخارجي أبدا ولو فعلت اغسل يدك بالماء والصابون 20 ثانيةالنقاب أو الإيشارب بوضعه المعتاد ليس كمامة ولا يغني عنها لأنه ليس محكم الغلق على الأنف والفم بالإضافة إلى كونه عادة من طبقة واحدة من الحرير أو الحرير الصناعي أو الألياف الصناعية فالأخوات المنتقبات إما أن يرتدين كمامة عادية تحته أو زي ما بتقول بعض الدراسات في الدول التي يكثر فيها النقاب اشترطوا يكون النقاب مكون من 4 طبقات محكمة الغلق حول الوجه وليست بالشكل المتباعد عن الوجه كما هو المعتاد
الفيس شيلد face shield أو درع الوجه للي بيفضلوا الترجمة الحرفية = ليس كمامة ولا يقوم بعملها ولا يغني عنها
الفيس شيلد كويس جدا في حماية العين وإن وجهك يكون نظيفا خصوصا لو هتتعامل مع رذاذ مباشر ولو فايدة للناس اللي مش بتقدر توقف إيدها عن لمس العين وهم برة لأنه حاجز هيفكرك وكمان له فايدة في تطويل عمر الكمامة تحته لأنه هيمنع وصول الرذاذ المباشر لها
لكن أؤكد الفيس شيلد مش كمامة بل يستعمل معها وليس وحده وليس بديلا عنهابالنسبة للأطفال تحت العامين لا كمامة
والأكبر من كدة لو مش هنقدر نسيطر عليهم في ارتداء الكمامة ونثق إنهم يلتزموا بالإرشادات دي خصوصا لو سنهم صغير يبقى لازم نحافظ على تباعدهم عن غير المخالطين لهم
بلاش زيارات مع أطفال في أماكن مغلقة
بلاش خروج لهم من غير ضرورة وإن كان ولابد يبقى يتشمسوا في مكان مفتوح في الهواء الطلق
الأطفال بشكل عام في أمان بالنسبة للأعراض والمضاعفات باستثناءات لا تذكر لكن ممكن ينقلوا المرض للفئات الخطرةفيه كلام عن إعادة استخدام كمامات n95 وطرق تعقيمها وهو كلام كتير وفيه خلاف كبير لكن أكثر الآراء إنك ممكن تدخلها في فرن جاف على درجة حرارة 70 لمدة نصف ساعة أو تتركها بعد الاستعمال أسبوع ثم تعاود استعمالها طبعا كل ده بشرط ما تكونش تمزقت أو ابتلت برذاذ كثير زي ما بيحصل مع بعض الأطباء
أكرر ده فيه خلاف عشان ماحدش يصر على الجدال في النقطة ديلو الكمامة غالية أو قماشية يعاد استخدامها فخذ بالك لما تخلعها يكون الخلع من الشريط المطاطي الخلفي ويكون الاحتفاظ بها في علبة مخصصة أو كيس تتخلص منه بعدها مش تكرمشها وتضعها في جيبك أو تضعيها في حقيبة يدك أو محفظتك وسط الفلوس (اللي ممكن تكون ملوثة) أو باقي أشياءك
وبالمناسبة انت ممكن تتكلم عادي وانت لابس الكمامة 😊
مش مضطر كل ما تحب تقول حاجة تشيل الكمامة او تنزلها احنا كلنا سامعينك وانت لابسها عادي 😁
ويا ريت مش كل شوية تخلعها وترجع تلبسها وانت برة
كدة إيه لزومها بقى 🤔
وبأكرر تااااااني وتاااااالت ورابع الكمامة دي بتاعتك انت لوحدك لا مشاركة فيها ولا جدعنة ولا تضامن عائلي
وبعد ما تخلعها من الشريط المطاطي = تخلص منها بعد تمزيق الشريط المطاطي وأرجوك بالله عليك ما ترميهاش في الشارع وتمشي شوف سلة قمامة أو كيس
ثم بعدها مباشرة غسيل الايدي بالماء والصابون 20 ثانية أو الكحول لو مافيش صابون (بس الصابون أولى)
حاولت في النقاط السابقة أوضح الموضوع بشكل غير مخل وبأعتذر جدا عن التطويل اللي غرضه التوضيح ولو حد عنده إضافة يحب يفكرني بيها يتفضل وهأزودها في المنشور وأرجو مرة أخرى محاولة نشره قدر الوسع لعلك تساعد في وقاية إنسان
وربنا يعافينا
