افهم صح واوعى تفتكر

 

 بقلم / أمل الوكيل 

 #اوعى حد يحاول يفهمك ان العيب فى الناس . الناس ديما فيها الكويس و فيها الوحش . لكن فى حاجة اسمها نظام يطبق و ثواب و عقاب على الجميع و بالتالى كل حاجة تتظبط . و دا طبعا مش دور الناس دا دور الدولة .

# اوعى حد يفهمك انك لازم تبدأ بنفسك عشان يتم الاصلاح ، فى دول الشرق بشكل عام الاصلاح ارادة دولة مش ارادة مجتمع .

# اوعى حد يفهمك ان المشكلة فى الدين او فى التدين . المشكلة فى الجهل بالدين  .

# اوعى حد يبيعلك فكرة الزواج مشروع اجتماعى فاشل . تكوين اسرة فى نطاق شرعى من ارقى المشروعات الى ممكن تعملها فى حياتك لكن مش فى بلادنا . بلاد العقد الاجتماعى بتاعها انهار . و الجواز فيها بقى مجرد عبء مادى و اجتماعى و نفسي .

# اوعى حد يحاول يقنعك اننا عندنا مشكلة امنية . المشكلة فى التعليم و العدالة الاجتماعية .

# اوعى حد يفهمك اننا عندنا مشكلة فى الالتزام بالدين . المشكلة فى التعليم و العدالة الاجتماعية .

# اوعى حد يبيعلك انك لازم ترضى و تشتغل كتير و تاخد قليل و ان ربنا بيقول كدة . لان ربنا كامل و الكامل عادل و العدل لا يقبل بانك متخدش حقك تحت شعار الرضا .

# كل الى فات ده لا يعنى ان الواحد يقعد و يحط ايده على خده . لان من عدل الكامل العادل . انك و على الرغم من كل الظروف الغير ادميه الى بنعيشها فى بلادنا . فان الله لا يضيع اجر من احسن عملا . و بيكرم الى بيبذل مجهود . سواء كان مسلم او مسيحى او يهودى او حتى كافر . دا قانون رباني . ان الله لا يضيع اجر من احسن عملا