التضحية وتطوير الذات

بقلم /أ.د. نادية حجازى نعمان.

بقى لي مدة ماشفتكش …إيه أخبارك وبتعمل إيه فى حياتك دلوقت ؟ الحقيقة حاليًا شاغلني شوية موضوع إني بأعمل تطوير لذاتي ….بتطور ذاتك إزاي بتعمل إيه يعني …أخدت شوية دورات فى الموضوع وحضرت محاضرات وأقرأ على النت ومعي مدرب لتحقيق خطوات هذا الأمر…ووصلت لفين فى السكة دي ؟ شوية حاجات لازم تتعدل للوصول إلى الإتزان النفسي مثلًا طلع إني بأضحي كتير أوي وبآجي على نفسي بطريقة زايدة على حساب صحتي ووقتي ونفسي لإسعاد وإرضاء الناس حواليا…..طيب وده يزعل فى إيه هما قالوا كلام تاني ؟….أيوة وقريت على النت كتير إني مش مسئول عن سعادة العالم كله…قريت ان الإنسان ممكن يبتسم فى وجة أخيه وممكن يدي صدقة لفقير يدخل بها السرور على قلبه و…..وهذا كلما أمكنه ذلك …لكن أن يستمرفى الضغط على ذاته طوال اليوم من أجل الآخرين ويكون هذا سمة لحياته فهذا يحتاج وقفة مع النفس فعلى الإنسان أن يضع نفسه أيضًا فى بؤرة اهتمامه …تمشية فى الهواء الطلق …قعدة ف جنينة …أمارس هواياتي…..
تصدق أنا برضه زيك ماعملتش كده من سنين…..هوه كل الناس مضحيين وألا إيه !!…أمال مين اللي بيتضحى له !!….الحقيقة إن ناس كتيرة بتعرف تاخد من المضحي كل اللي هيه عايزاه وموجودين كتير .
أنا عايز أنا كمان أمشي معاك فى موضوع تطوير الذات ده ….طيب مدام حتمشي معايا فى الموضوع ده أولًا عايز أقولك إحنا حنطور جوه …أيوة جوه …حنطور شخصيتنا و ثقتنا بنفسنا وحاجات جوه تانية كتير وحنعوز صبر .
كمان لابد من الإبتعاد عن السلبيين وكل الذين لايقدرون ذاتنا وأن نعمل بإيجابية ومع الإيجابيين ونعمل ونحن سعداء ومستمتعين ونعطي لكل من حولنا حقوقه ومنهم ذاتنا والرسول صلى الله عليه وسلم قال : ” إن لربك عليك حقًا وإن لنفسك عليك حقًا ولأهلك عليك حقًا فأعط كل ذي حق حقه “