الحب لا بييجي قبل الجواز و لا بييجي بعده

كتبت ياسمين يحيي

جرب كده تجيب بنت هيمانة فيك… انت الدنيا بالنسبة ليها… و متبينلهاش إنك راجل… و لا تتحمل مسؤوليتها… و لا تحتويها… و لا تبقى سندها في حياتها… و لا تحسسها بأي حاجة مستنياها البنت من الراجل… و ابقى قابلني لو كملت معاك… مستحيل… دي فطرة

الحب فعل… و الأفعال دوما على عاتق الرجال… و ستظل هكذاالحب

بييجي لما 2 يقرروا يحبوا بعض في أي وقت سواء كانوا صحاب.. معارف.. صدفة

الحب مش هو الوله اللي بيجيلك لما تعرف شخص معين و تحلم بيه و مشاعر في السما و شعر و نثر

كلنا مرينا بده و كتبنا شعر و نثر واشواق
الحب بقى لما تتعامل مع الشخص ده و تعرف تحط ايدك في ايده و تجاهدوا صعوبة إن شخصين مختلفين يبقوا شخص واحد لحد ما تبقوا شخص واحد فعلا و الموضوع ده صعب و مجهد فوق الوصف
نجحتوا يبقى حبيتوا بعض… منجحتوش يبقى محبيتوش بعض و عمركم ما هتحبوا حتى لو متجوزين و بينكم ولاد
الحب بجد مش مشاعر خالص… الحب بجد أفعال و تعب و مجهود عشان تمتزج فعلا بشخص آخر
عشان كده الحب فعلا للكبار مش للصغيرين… و للرجالة فعلا أكتر من الستات
ممكن ولد و بنت يبقوا إصحاب لدرجة لا تتخيلها… إخوات مثلا… توأم… و أول ما يقرروا يحولوا العلاقة لأنهم هيعيشوا سوا و ارتباط… دخلوا في الجد… يخافوا… يتصدموا… ميعرفوش يكملوا… مقدروش غصبا عنهم… و دي أكتر قصة بتحصل في الواقع
مش معنى كده لما حد يبقى في أول علاقته بحد و يقوله بحبك هو كداب… هو لو صادق… فنيته و قصده إنه هيعمل كل ما في ايده و طاقته عشان يثبت انه اد الكلمة دي… عشان يبني الحب ده و ميستسلمش ابدا… ده لو راجل فعلا… و ممكن يفشل و ساعتها هيعتذر بكل رقي و يمشي

في مقولة بتقولك true love isn’t found, it’s built

و مقولة بتقول…. الحب نوع من أنواع النضال

حاجة كمان… الناس لازم تعرف إن البنت هتفضل طول عمرها passive… دي خلقة ربنا و دي الحقيقة

البنت ممكن تعجب و ممكن تبين إعجابها ده ليك
لكن الراجل هيفضل طول عمره positive – active… لازم دايما انت اللي تاخد المبادرة… انت اللي تبين فعلا انك تستحق إعجابها ده… و إلا هيروح قريب… تحول الإعجاب ده لحب بالأفعال… البنت دايما هتفتح قلبها مرة واحدة لأكتر واحد أثبتلها يعني ايه حب… بمعنى آخر البنت دايما حيرانة لحد ما تلاقي الحب فعلا مع شخص يثبتهولها و يوريهولها… و هترمي نفسها وراه فعلا

الحقيقة اننا بنعرف بعد زمن إن احنا بنقعد طول العمر نستنى الشخص اللي يستاهل نحبه… أو امتى نبذل مجهود و عناء الحب في الطريق الصح و منلاقيش حيطة سد

فأمانة عليكم اللي بيصدعنا عن الحب و آهات الحب… و لوعات فراق حبيب لم يصل إليه… يتكتم و ميفتحش بقه غير لما يجرب و يعرف… كان زمانه أو زمانها أول ما جرب جد العلاقة مع حبيبه اللي هيمان في ذكرياته ده اتصدم من الواقع و معرفش يتصرف