الدكتور فكرى بسطا يحذر من المرض الخبيث

العادات الغذائية السيئة سبب رئيسي في انتشار أورام القولون

كتب – وليد على

حذر الدكتور فكرى بسطا إستشارى أمراض الباطنة والكبد والجهاز الهضمى ، من انتشار الاورام مؤكدا على الوقاية و أهمية التغذية السليمة .

قال الدكتور فكرى الفترة اللي فاتت الاورام الخبيثة انتشرت بشكل كبير ..و اورام القولون والشرج بشكل خاص

وبحكم شغلي في المجال ده بقولكم

الوقاية مهمة جدا.… وان العادات الغذائية السيئة سبب رئيسي في انتشار أورام القولون بشكل كبير..

الملاحظات اللي جاية دي مهمة جدا جدا ليك ولاولادكم و لأهاليكم..

١- ابعد عن اللحوم المصنعة خالص..سوسيس .. برجر .. لانشون .. بسطرمة.. ولحمة مفرومة ..

هات لحمة من الجزار وخليه يفرمها ..انت مش عارف ايه اللي مستخبي جوا كل مكسبات الطعم دي.

2 – جوع كتير.. صوم .. الجسم بعد صيام مدة طويلة بياكل الخلايا الوحشة .

٣- قلل سكرك علي قد ما تقدر.. العادة خلتنا ننسي طعم الحاجة وبنشرب وبناكل سكر لأنه الخلايا السرطانية بتتغذي علي السكر

٤- حاول علي قد ماتقدر ما تاكلش برة نهائيا ..اعمل اكل برة  جوة البيت.. علي قد ماتقدر.

٥- كل فاكهة .. كل خضار كتير.. اغسلهم كويس بمياة والخل .وطبق السلطة مهم جدا

٦- إشرب مية نضيفة معدنية من شركة محترمة او فلتر كويس وتابع صيانته بإستمرار

٧- حاول علي قد ماتقدر تقلل استخدام الميكروييف …خلي اكلك طازة احسن

٨- الزيت اللي تقلي بيه مرة ارمية.. وماتستخدمهوش تاني.. خليك كريم مع اهل بيتك ونفسك.  ماتحطش البطاطس والطعمية المقلية علي ورق .. هات مناديل.

٩- لو بتدخن ..بطل دلوقتي .. ولو مش بتدخن احمد ربنا علي النعمة دي وحافظ عليها

١٠- لو بتقدر تجري اجري لومش بتقدر امشي كتير.. روح جيم ..العب تمارين في البيت ..الحياة حركة

١١- نام كويس خالص.. نام كتير .. نام بدري.

١٢- متشربش عصير معلب ابدا ..اعمل عصير فريش اشربه انت واولادك.

١٣- بلاش مياة غازية  ..تخلص من العادة دي .. مش هتستفيد حاجة وهتخسر كتير

١٤- ماتحطش الفتلة ولا الكيس بتاعها في المية السخنة .. فضيها جوة المج وضيف عليها المية السخنة

١٥- اوعي تشرب حاجة سخنة في كباية بلاستيك .. البلاستيك بيتفاعل مع الميةالسخنة والنتيجة مش هترضيك .. الموضوع منتشر جدا في القطر و المواصلات والمؤتمرات.

١٦- إشرب قهوة .. بلاش نسكافية..بلاش كريمر.. انت مش عارف تصنيعه ازاي.

١٧- لو معدتك مفيهاش مشاكل.. إبلع قرصين ثوم كل يوم.. قبل الأكل اوبعده مش فارقة كتير..الثوم من مضادات الأكسدة القوية جدا

١٨- ماتحطش المياة في الثلاجة في زجاجات بلاستيك عادية .. حطها في زجاج .. ولو مفيش في زجاجات بلاستيك  مخصصة للمياه اّمنه

19- حاول ماتاكلش بعد المغرب اكلات ثقيلة .. التمثيل  الغذائي بيقل بالليل ..كل فاكهة .. كل زبادي .. كل جبنة قريش.

ختام.. احمي نفسك وعيلتك .. المرض وحش .. وحش جدا ..

إستمتع بالأكل والشرب.. بس كل اكل صحي وإشرب شراب صحى

أسعد الله أوقاتكم بكل خير