كتبت / عزه السيد
الستات المصرية
احنا فى مصر ماعندناش حاجه بتترمى ولا حاجه بتبوظ ويمكن ده سر البركه والخير اللى دايماً بيوتنا بيه عمرانه
ومافيش قلق وكل بيت فى مصر حرفياً فيه وزيرة إقتصاد وزوجه اروبه ولهلوبه تلاقى الأم من دول استاذه فى تحويل الفسيخ لشربات دي حقيقه بجد
شوية الفاكهه دى دبلت، الحقى لفيهم بشوية سكر واعملى احلى مربى.
طب الخيار ده كرمش وبيحتضرما فيش مشاكل شوية مايه وملح وارمى فى برطمان هايسترد عافيتو ويبقا بُمب
اللبن قطع عادى شاشه وصفيه ورشة ملح وقرن فلفل ونعمل احلى جبنه
طب والشرش اللى هاينزل نعتقد مانبقاش امهات مصريه اصيله ارمى عليه شوية دقيق وحتة قشطه من وش اللبن اللى محوشينه وقرّص وشغّل الفرن ودفِى البيت مِعده و حيطان
شوية بطاطس مسلوقة نهرسها ونعملها كفتة احلى كفتة
ورق العنب غالى، عادى نحشى ورق خس مع عصرة ليمون ونعمل حلة محشى يحكى ويتحاكى عنها اللى رايح واللى جاى
شعب صاحب مزاج اللقمه الناشفه فى بيته خروفطب بذمتكو فى شعب فى العالم اكله محبِّش وطِعم لوحده كده من غير لحمه ولا فراخ ولا سمك غيرنا
لو جبتي نص كيلو لحمه مفرومه قسميه علي خمس اجزاء وانتي بتعملي اي طبخه خدي منه قطعه هتكون ١٠٠ جرام
وتضيفيها مع اي طبخه بتعملها زي بسله فاصوليا بطاطس أو كوسه أو تورلي
هيبقى تحفه بجد بس شوحيها مع البصله أو التومه اللي هتطبخي بيها تشويحه سريعه كدا تطلع ريحتها وتعلي النكهه ومش لازم نستنا نشتري كيلو لحمه عشان نطبخ
رغيف بلدى ملدِّن صح مع قرصين طعميه واحبس بكوباية شاى مغلى سكر منه فيه جوا براد صاج ، عندنا بالدنيا واللى فيها.
والا شوية كشرى أصفر معمولين بحب و جمبهم طمطمايه وشوية بدنجان مخللين بالتوم و طبق مخلل وعودين جرجير وبيضتين مدحرجين فى السمنه البلدى( لزوم البروتين)عندنا اجدع مليوون مرّه من خروف
جماعه احنا شعب جميل أوي بيوتنا دافيه وعمرانه أوي اللى زينا عمره مابيفرق معاه ظروف ولا بتكسره قِلة فلوس
قووولوا الحمد لله على كل حال والله مافيش أحلي من نعمة الرضا ومن حمد الله ذادة من فضلة وكرمه وربنا يوسعها علينا و عليكم جميعاً يارب العالمين