كتبت عزه السيد
مأساة يعانى منها المواطن المصرى عند توجهه لأى مصلحة حكومية لتخليص أى معاملة شخصية ،عانيت منها أنا عند توجهى لمكتب التموين بالمطرية ، عندما تدخل المكتب قد لاتجد مكانآ تضع فيه قدمك وهو عبارة عن شقه من ٤ حجرات بينهم ممر مترين فى مترين تمتزج فيه الطوابير الخارجه من كل الغرف ، لا تعرف أى غرفه فيهم بها المسئول عن مشكلتك، فهناك من ذهب لإستخراج بطاقة تموين جديدة، ومن ذهب لحذف فرد تزوج او توفى، ومن ذهب لإضافة ابنه او بنته ،ومن تزوج ويرغب فى إضافة زوجته ، ومن يرغب فى استخراج البطاقة الذكية بدلآ من الورقية، وكلهم يعانون.
قالت لى سيده : انا بطاقتى ضاعت وكان فيها انا وخمس من ولادى ولما عملت بدل فاقد بعد اكثر من سنه طلعت الجديدة وولادى مش فيهاوبقالى ٦ شهور باجى ويقولولى السيستم واقع وكل ماجى اقف من ٩ الصبح حتى بعد الضهر وارجع زى ماجيت.
سيده اخرى كانت مشكلتها ان فرد من افراد اسرتها توفى وجايه تحزفه وكل مرة السيتم واقع او ورقه ناقصه وكل شهر بتزيد الغرامه عليها حتى وصلت ٦٠٠ جنيه والست بتعيط وبتقول حرام عليكم انا مش متأخره انتم اللى عندكم المشكله فى البتاع اللى بتقولو عليه السستر ده تقصد السيستم.
رجل كبير فى السن قال لى : والله يابنتى انا باجى هنا كل يوم بقالى اسبوع وقفت فى كل الطوابير هنا كل مايجى دورى يقولولى لاء حضرتك روح الاوضه اللى هناك وارجع اقف الدور من الاول ومحدش عارف مين يروح لمين، وكل ده علشان اشيل مراتى اللى ماتت ماهو موت وخراب ديار.
شاب فى الثلاثين من عمرة قال لى : انا متجوز من ٥ سنين وغلبت علشان اشيل نفسى من بطاقة والدى واعمل بطاقه خاصة بيا ولما حزفت نفسى جيت اعمل البطاقة عملولى بطاقة ورقيه ودى مينفعش اخد بيها عيش وجيت اطلع البطاقة الذكيه قالولى حواله عملت صور ورق صورت طب تعال بعد اسبوعين اسأل وكل ما أجى مافيش ،لسه ، تعال تانى بعد اسبوع، السيستم واقع، السيتم هيشتغل بعد يوم ٢٠ وهكذا طب اعمل ايه بس.
سيدة أخرى قالت لى :انا قالولى عند التاجر روحى مكتب التموين علشان تسألى بطاقتك طلعت ولا لسه مع العلم انى بقالى ٥ سنين دايخه كل شهر التاجر يقولى صورى ورق واعملى حواله واصور وأعمل وكل ما اروحله اسال البطاقه طلعت يقولى لاء وشهر ورا شهر وسنة ورا سنة وانا كل اللى معايا الورقه اللى بصرف بيها وادينى دايخه كل كام يوم اجى اسال ومحدش بيفيدنى واديكى شايفه المكان ضيق ازاى وكل أوضه على بابها ٢٠ واحد وعمالين يتخانقو ويشتمو ويلعنو، طب نعمل ايه يعنى مش قادرين يعملو مكان اكبر ويخلو كل موظف مختص بمشكله معينه علشان الناس تعرف تروح فين وتسال مين؟ ولا الحكومه مش لاقيه مكان وعايزين يغلبو الناس لحد مايقولو خلاص يغور التموين مش عايزينه.
سيده كبيرة السن خرجت من الحجرة المواجهه لى تتشاهد وتقول والنبى اللى بيعرف يزغرط يزغرط انا الحمد لله بعد ٩ شهور رايحة وجايه ومصاريف مواصلات وبهدلة الطوابير طلعولى بدل البطاقة اللى كانت ضايعه منى دنا هحطها بعد كده بين رموشى ،عقبال عندكم جميعآ وتخرجو من هنا منصورين!
أما انا فالحمد لله بعد ان أتى دورى بعد حوالى ساعتين الموظفةقالتلى حضرتك تيجى بعد يوم عشرين يكون السيستم إشتغل!!!!!!
غريبه هو السيتم لما وقع قللهم انا راجع بعد يوم ٢٠