الشعر الحلمنتيشي…رسالة الجنية المصرى
كتب حسن القناوى
انا اللي كنت الدهب
بقيت جنية فضه
ولكل أجل كتاب
والعمر يتقضي
اللي باقي بس أسمي
موتوني .. وتفوا علي كام تفة
وكفنوني .. وأستخسروا الدفنه
يعني عايش بس ميت
يعني ميت بس عايش
يعني بين البنين
يعني اعمي .. بس بعنين
مشلول واقف علي رجلين
أسمي في الشهادة جنية
جدي باشا وأبويا بيه
كان لي صوت مسموع
يا ما مسحت دموع
وكنت أطيب خاطر المضايق
وكنت قيمه وسيمه وكنت متعايق
وكنت اوفق راسين في الحلال
ولو يفكوني أملي البيت غلال
يعني يدي طايلة ولي ألف ألف حيلة
واللي مقطوع من الشجر ابقالة عيلة
يعني مكانش في غلطة
دلوك جواي العلل بالكوم
اللي يقلك جاتله جلطة
ولا نام زعلان وقام ملكوم
غايتة بقيت سيرتي ملعون
غايته بقيت رجلي مشلوله
واللي يتباها بي أكسفه
واللي يتسند علي أخسفه
مش أشتري كوم غلال
دلوك ماسواش الرغيف
مش كنت أوفق راسين في الحلال
دلوك نصيحتي خليك عفيف
حرام عليكم كلكم
أنا العزيز تذلوني
لو لي خاطر عندكم
بعد ماتكفنوني تدفنوني
حسن القناوي
