الطفل العنيد.
كتبت / عزه السيد
4 قواعد لتسهيل التعامل مع الطفل العنيد
الطفل العنيد
-ماما ينفع أتفرج على التليفزيون
-لأ..لما تخلصي الواجب الأول.
ده رد غلط
والصح
-ماما ينفع أتفرج علي التليفزيون
-أيوا طبعًا ينفع ياحبيبتي، أول ماتخلصي الواجب اتفرجي.
ودي القاعدة الأولى من قواعد التربية الأربعة لتسهيل الحياة اليومية مع الطفل العنيد:
مابنقولش لأ أبدًا (لأ بتحسس الطفل انك ضده وبتستفز عناده، الطفل اول مابيسمع كلمة لأ، بيحس أن حريته بتتقيد وأنه لازم يدافع باستماتة عن حقه، فيبدأ يعترض وينفعل ويعند)
القاعدة التانية:
بنطلب اللي عاوزينه منهم بأقل عدد من الكلمات، وبهدوء ومن غير زعيق، ولو رفضو بناخد رد فعل يعني الكلام بيتقال مرة واحدة بس.
مثال:
-من فضلك حبيبي لم ألعابك من الأرض.
-لأ.
-معاك ١٠ دقايق تلم ألعابك، بعدها أي لعبة هتكون ع الأرض هناخدها دولاب ماما ترتاح أسبوع ومش هيكون من حقك تلعب بيها.
لما بنقعد نزيد ونعيد في الكلام ده بيحسسهم أننا سهل نتشد لجدال معاهم، ومابياخدوش كلامنا علي محمل الجد.
القاعدة الثالثة:
هنديله اختيارات، لما بنعمل كده الطفل بيحس أنه القرار في ايده وده بيخليه أهدي و أقل عِند.
مثال:
بنزور ناس أصدقاء وابنك بيلعب مع ولادهم، مش فجأة تقولي ياللا عشان هنروح، قبلها بنص ساعة قوليله:
-حبيبي تحب تلعب مع اصحابك ربع ساعة كمان ولا نص ساعة؟
أيًا كان خياره هنحترمه وهنروح معاه فيه.
القاعدة الرابعة:
لازم نوريه اننا متعاطفين معاه، الطفل العنيد بالذات بيبقي حساس جدًا ومحتاج اللي حواليه يوروه أنهم فاهمين مشاعره، ولما بنطلب منه حاجة بنقوله من فضلك ولو سمحت.
مثال:
المثال اللي فات نبهناه قبل الميعاد بوقت واديناله خيارات، دلوقتي هنقول:
-ياالا حبيبي النص ساعة خلصت.
لو بدأ يتعصب ويقول لأ مش عاوز امشي، اديله حضن وقوله:
-أنا عارفة أنك مبسوط باللعب هنا وعارفة أنه صعب عليك أن وقت اللعب يخلص، عشان كده هنيجي هنا تاني، لكن دلوقتي لازم نروح.
العند عند الأطفال ليه أسباب كتير، لكن ملكة الابداع والابتكار عند الأطفال دول عظيمة جدًا، ودايمًا تلاقيهم عندهم نزعه للتعاطف مع الضعفاء وتحقيق العدالة علي الأرض لما يكبروا.
حبوهم وافهموهم وحسسوهم أنهم مميزين وأصحاب قرار.
مثال صغير..
ابنى او بنتى عايزه تلبس لبس معين وانا عايزه لبس معين هى مصممه وانا مصممه هلغى اختياره واختيارى واختار حاجتين تانين خالص وأبدأ اخيره يختار اى واحد فيهم هنا خلينا الطفل يختار ومأذناش شخصيته وبنفس الوقت مش مشى كلامه علينا
