شعر :عبدالتواب الرفاعي
الناس بتصرخ م الغلا
و من البلا
من قهر زاد على قهرهم
الناس بتلطم كلهم
الناس مناهم يفهموا
أو حد يجي يقولهم
الناس في توهة كلهم
أبو العيال مع أمهم
اللطم زاد على وشهم
و البشوات ف الإعلانات
و كأننا مش منهم
الناس بتلطم م الشقا
كاتمين كلامهم في البطون
بيخافوا حبل المشنقة
الناس غلابة و حلمهم
قوت العيال
يلقوا الغسيل
على كل لون فوق الحبال
الناس حدانا في البلد
كيف الجبال
صبر الجمال
رغم المآسي كلها
متحملين لجل العيال
لجل إن بكره يبتسم
و الحظ يجي و يتقسم
خير البلد على حيهم
شكل الغلابة ف وشهم