بدايات حميمة ونهايات عصيبة

كتبت/ ياسمين يحي

فى بداية اى علاقة جديدة كل واحد بيحاول يبين احسن ما عنده .. ويدارى اوحش ما فيه ..
من كتر ما بيتعلق باللى قدامه ومن كتر فرحته انه لقاه .. بيخاف يخسره فـ بيوهمه ! يوهمه انه الشخص اللى التانى بيدور عليه .. وعود كتير… واحلام اكتر ..
بس مع حبة وقت .. كل الاقنعة دى بتقع .. والعيوب بتظهر والأنانية بتبان ..
وكل واحد بيستنى التانى يتنازل وغالبا بترسى ع اللى حب اكتر ..او بمعنى اصح اللى اتوعد اكتر ..
فتبدأ الحساسية تزيد .. والعتاب يتسمى نكد .. ويتقسموا اتنين!
واحد ماسك اوى والتانى مطمن اوى .. ويفضل اللى صدق واقف مكانه ..
لا قادر يحلم زى الاول ولا قادر يبعد ..
خوف من الوحدة على فكرة اكتر من الخسارة ..
لإنه ببساطة حب حاجات مكانتش اصلا موجودة ..!
فبتبدأ الملامح تتغير و الاحلام كمان تتغير…ومع حبة وقت ملامحك بتروح وبتكبر .. وخوفك بيزيد ..
بتكتشف ان الوعود مش فى الكلام الوعود فى الحياة اللى بتتقاسموها مع بعض..
بتكتشف ان الوحدة احسن بكتير من انك تكون مع شخص بيهد فيك ….!
مع شخص كان جاى يحقق احلامه مش يشاركك احلامك .. مع شخص مفيش حاجة عنده اغلى من نفسه.
نصيحة…خليك على طبيعتك .. ولو حبيت حب بشويش .. ولو اتحبيت اوى متستغربش انت اصلا تتحب .. بلاش تشوفها كبيرة عليك !!
ولو سمعت استنى لما قلبك يشوف ..
الحكاية كلها تركيبة وعمرها ما هتيجى لا بالزق ولا بالعافية ..
خليك واثق ف نفسك وخليك على طبيعتك وهدى مشاعرك وشارك عقلك مع قلبك متطمنوش اوى كده ! عشان ميجيش يوم وينكسر ضهرك…….

“استمتعوا بالبدايات
فالنهايات محفوظة صم “