أراء وقراءات
بنت بتحكى .. الفراق
بقلم / أمل الوكيل
أنا شخصية عندي فوبيا كبيرة من الفُراق، و فوبيا بمعناها الحرفي.
لما بتكلم مع حد قريب مني و أحس أنه أختفي شوية أو أتاخر في الرد عليا، بقدر أفكر في مليون ألف فكرة.
يا ترى زهق مني؟، انا عملت ايه غلط؟، اكيد انا السبب، أنا بخاف جدًا من الفقد بكل الأشكال،
و طاقتي متستحملش أن حد قريب مني يكون متغير معايا، ببقي مش فاهمه، وفكرة أني أكون مش فاهمه حاجه دي بتفقدني طاقتي كلها.
ببقي مش قادرة أتنفس بشكل صح، مش عارفة أنام، و ممكن أدخل ف دوامة اكتئاب كبيرة،
أنا نفسي متستحملش أي ضربة بسيطة، و لأني شخصية حساسة جدًا فحتي دموعي ممكن فجأة تبقي ملهاش معني، و الألم يتسرسب لجسمي بشكل ما.
أنا بقيت خايفة أعرف ناس، عشان خايفة من لحظة بُعدهم عني.
