كلمات / هشام عبد المنعم
فات اللي جاي عالقلب ماتحَسِش
عدى اللي فات فالروح ومتكلبِش
بيدندن المقطع بصوت (الست)
“كُنت باشتَاقلك
وانا وانت هنا
بيني وبينَك.. خطوتين
شوف بقينا ازاي؟! أنا فين
يا حبيبي.. وأنت فيين”
تسقط عينيا حزن جوا كاسين
أشرب بإيدي المُرّ وحداني..
بيني وبينِك
مش كلمة من حرفين
مانطقش عقلي
خاف لنهري يجف
فيضان بيجري عدى بلساني
نَطقِت حروفها الروح
من غير ما عقلي يحس..
رَسمِك بقلبي
لسه متدبس
لوِّن هوايا بريشة ماتبتلش
ماشي فعز البرد متلبش
وفي وسط كوبري الأوبرا
أنا مانسيتش
فيه تحت قاع النيل
كوينين بيحضونوا بعض
غرقان معاهم
لسه أنا ما طَفتش
قولت فساعتها
ليه مانزلوش سوى
قولتيلي فالقاع أكيد
هيحضونوا بعض..
ياعيون بتغزل حزنها
بخيط الشبك
قلبي ارتبك
جوه الرصاص اللي انطرح
قرر يموت زي السمك..
**
بيني وبينك ألف ميل
ليه جوا عينك نني روحي يميل
مش كان فعينك شمس بتنور
خطف شعاعها الصامت الأول
كل الحاجات مني متهزتش
*
بيني وبينك نور
محفوف رايات ضلمة
بيني وبينك سور
مالغيمة والعتمة
بيني وبينك وردة ف « الفردوس »*
فوقني شوك «الجحيم »* فوت فقلبي السهم
سابني جريح مالمستش «المطهر»*
لا طولت جنة سما
و لا شُفت جنة أرض .
——————
- (الفردوس- الجحيم- المطهر) : ثلاث كتب هم الملحمة الشعرية القديمة “الكوميديا الإلهية” للشاعر دانتي أليغييري