تعالوا نعرف ربنا عايز مننا إيه

بقلم: عزه السيد

ربنا عايز مننا إيه؟

ربنا مش عايز مننا حاجه خالص، كل اللى ربنا بيطلبه  إننا نعمل الصح مش اكتر من كده، بيطلب مننا نصلى ودى فى مصلحتنا لأن الصلاة رياضه ، بيطلب مننا نصوم وده رياضه لقلوبنا وعقولنا وانفسنا ، ربنا قالوا نزكى يعنى نحس باللى مش معاه ونظيره من اللى معانا يعنى نحب بعض ونحس ببعض كمان ، ليطلب مننا نقول الحق ونعمله وده هيملا حياتنا أمن وسلام ، ربنا عايزنا نحبه مش نخاف منه ، نسمع كلامه اللى هوه كله فى مصلحتنا، ربنا عايزنا ناكل ونعيش ونحس ونشبع من الحلال لأن طعمه حلو وبيقربنا من الفردوس الاعلى ، وتبعد عن الحرام ونخاف منه لأنه مهما ذاد لازم هنحس بمرارة طعمه ولأنه كمان بيقربنا من النار  ،ربنا مش بيطلب مننا حاجه إلا لما بتكون فى مصلحتنا لأنه مش محتاج مننا حاجه ، ربنا عايزنا نحمده على النعم الكتير اللى بيديهلنا ونعرف إن الحاجه اللى مدهلناش اكيد مافيهاش خير لينا ، ربنا عايزنا نعرف إن رزقنا مكتوب لنا ومافيش حد هيقدر ياخد شئ منه مهما عمل وإحنا مش هنقدر ناخد رزق غيرنا مهما عملنا، ربنا عايز نفوسنا صافيه يعنى منطمعش فى اللى فى ايد غيرنا وبكده غيرنا مش هيطمع في اللى معانا ، شايفين كل اللى ربنا بيطلبه مننا فيه كل الخير لينا، يعنى ربنا مش عايز مننا حاجه ولا محتاج لينا إحنا اللى عايزين منه ،إحنا اللى محتاجينه