تيجي نسابق الزمن..

بقلم. ا. د/نادية حجازي نعمان 

تيجي نحاول نسابق الزمن ؟
ماحدش بيسبق الزمن
ماقلتش حنسبق الزمن
بأقول ماتيجي نحاول نسابق الزمن
مالناش دعوة حد سبقه وألا لأ
اسألني مثلًا نسابقه ليه
أو علشان نوصل لإيه
بس ماتقولش ماحدش يسبقه
سيبني وحدي أحاول أسبقه
باين عليك خايف تقع
أو خايف نَفَسك يتقطع
أو فاكرني حأسابقه أجيب خبر
أنا لاهدهد ولا حتى بأخترع
ولا حأعرف مين حصد ومين زرع
ولا حتى مين خايب ومين جدع
ولامين رزقه ضاق وألا وسع
حد قالك بأصدق قراية الفنجان
وألا بأصدق ضرب الودع
وإني حأعرف اللي جاي بكرة
وفلان حاسس بفرحة وألا وجع
وعِلان جعان وألا شبع
أنا عندي أمل ومقتنع
إن يكفيني شرف المحاولة
حتى لو هوه الأول للمسافة قطع
مش حأزعل ومش حأتوجع
أصلًا الزمن مش بينخدع