تيران وصنافير مصرية..شعر: جمال بخيت
زى الأمل فى الحرية
زى الـــــوشوش الخمرية
زى الفراعنة ولعنتهم
تيران وصنافير مصرية
…
زى المسلــــــــــــــــة فــــى ملكوتـها
والموميا عايشة فى تابوتها
وأحـــــــمُس اللى زرع قوتــــــــــها
وفــــــــاز بـــــــــشرف الجنديــــــة
تيران وصنافير مصرية
…
وزى سِــــــرّ قـــــــديـــــم مدفــــــون
فى مقبرة توت عنخ آمون
وكنز مخفى فى بحر قارون
وفَضْلنا ع البــــــشرية
تيران وصنافير مصرية
…
فى الماضى .. ولاّ فى الآتى
فى حياتى .. ولاّ فى مماتى
حكمة .. وشايلاها جيناتى
قبـــــــــل الجـــــــواز والجنــــــسية
تيران وصنافير مصرية
…
وزى دلتا .. ولاّ صعيد
وكل واحة بيوتها جريد
وفرع دمياط .. فرع رشيد
من الأزل .. للأبدية
تيران وصنافير مصرية
…
يا غردقة .. قلبى عشقها
يا بورسعيد .. عمرى ناطقها
يا دنشواى .. على مشانقها
يــــــــــــــا سوهــــــــــــــــــــــــــــــــاج ..
يـــــا نيل ..
يـــــــــــــــــا فواعلية ..
تيران وصنافير مصرية
…
وزى هاجر .. ومقامها
وسعيهــــــا فـ عز ألمها
والمية تجــرى فـ زمزمها
تسقــــــــى الحيــــــاة والحنيـــــــة
تيران وصنافير مصرية
…
وزى فرحى بإنجازى
وزى شيشى وقــــــــزازى
وزى ما نبينا حجازى
وحُـــــــــــب ستــى القبطيــــــــــــة
تيران وصنافير مصرية
…
زى النسيم فى نهار شدوان
والمَيــــّـــة فى خــــــزان أســــوان
رئتين حياة .. نبض وشريان
فردين حمام .. جوَّة الغية
تيران وصنافير مصرية
…
وزى أغنيـــــــــــــة صــــــــــــــــــورة
وجمال بنات المنصورة
وزى صيف المعمورة
والتاج فى مصر الملكية
تيران وصنافير مصرية
…
احفظها مهما العمر يطول
واعشقها زى الهوى ما يقول
غنيها ع الناى والأرغول
«حب الوطن فرض عليّا»
تيران وصنافير مصرية
…
الشعب قام ولاَّ ما قامشى
حَكَم القضا .. أو ما حكمشى
تيران عيونى .. صنافير رمشى
زى الحقيقة الإلهية
تيران وصنافير مصرية
