جانى أبويا فى المنام …

كتبت عزه السيد

جاني أبويا في المنام…
إتفرد جنبي ونام
قالي فينك بنت ضهرى
طب افتكرينى بزيارة
قلتله في الدنيا يابا
قالي دنيتكم خسارة
قلتله مطحونه يابا في الرحايا
بجري جري الوحش فيها
من صباحي ولمساية
قال يابنتى عيشى حياتك…
ارضى ربك وارضى ذاتك
قاللي اسأليني انا
مش هينفعك إلا عملك
إعملى الصالح تملي
زكي يابنتى
صومى صلي
خلي حسناتك تعلي
خلي ذكر الله تملي فوق لسانك
إدعي ربك كل لحظة
مش عشاني …..لأ عشانك
ده الدعا هيعلي شانك
وما تلمس ايدك حرام
ولا يدخل جيبك حرام
بالحرام بتضيق القبور
قلتله ويش حاله قبرك؟
قال يابنتى كله نور
قد ايه ربك رحيم
قد ايه ربك غفور
كنت رايح له وشايل
فوق كتافي ألف ذنب
بس كان جوايا قلب
ماعرفش الا إنه كان يحب
ربنا رحمته أوسع
مما يتصور خيالك

إبتسمت في ضي وشه
وقولتله دي مكتوبالك
ذدني يابا في النصيحة
قاللي هاقولها لك صريحة
إوعي يابنتى في مرة
تقسى
أو تكونى أداة لظالم
وإنصفى المظلوم تملي
خلي قلبك بيت مظالم
خدى يابنتى البال من امك
زيها مايشلش همك
دى في رضاها السعد دايما
مهما تعلي ولا تبني
خلي بالك من ولادك
هما دول مالك و زادك
هما دولة إمتدادك
قلتله نفسي اجيلك
قالي كل شئ يابنتى بأوان
كل واحد له أوانه
بالمكان وبالزمان

قمت بيساه فوق جبينه
ولمست بشوق عيونه
وصحيت من النوم بفرحة
شفت ابويا في المنام
من حلاوة الحلم نفسي
كل مااقوم تاني ….انام