حب الا ربع
بقلم / أمل الوكيل
” خبّي حاجة لنفسك “
اتعلم لما تدخل في علاقة أيًّا كان مسماها، إنك تخبي حاجة لنفسك، يعني إيه تخبي حاجة لنفسك؟! يعني متخليش كل أوراقك مكشوفة، يعني تعرف إن قلبك مش ملطشة، يعني تخبي شوية حب وتخليه مش ظاهر للطرف الآخر .. يعني متحبّش بكل ما فيك. طبيعي دلوقتي تسألينى وتقولي: ” طب لو محبتش بكل ما فيا هبقى محبتش بجد ويبقى مش حب أصلا؟! “.
هقولك لا العبها بذكاء. اللي بيحب بكل ما فيه زي اللي بيدخل رهان من غير ما يعمل حساب لأي يوم أسود، زي اللي بيغامر بحياته من غير ما يعمل حساب للمجهول. النفوس بتتغير والحب بيتهز ويقل، ومفيش شيء مضمون.. اللي بيحب بكل ما فيه.. هيجيه عليه اليوم ويحس إنه مفلس.. معندوش حاجة.. عارفة ليه؟! لأنه قدّم كل حاجة… قدّم كل أيام الأسبوع، قدّم الصبر والتضحية والحب، وداس على أحلام كتير جواه.. في سبيل إن الطرف الآخر يقدر ولو ربع تقدير… وفي أغلب الأحيان بيكون الحصاد #خيبة مع كل أسف.
الحب احترام وتقدير وعشرة وصبر، بس أحيانًا الحاجة لما بتزيد عن الحد، بتضر، بتفسد، حتى لو كانت حاجة كويسة.. احنا لما بندلع الطفل الصغير بنعمل كدة بكل حب، بنوفرله كل شيء، وكل طلباته مجابة، لأننا بنحب بجد، ومش بنكون عاملين حساب لشيء غير إنه يكون سعيد حتى لو على حساب راحتنا وإمكانياتنا، لكن مع الوقت.. الطفل هيزهد، وهيطمع، وهيتمرد، وساعتها الندم مش هينفع.
في العلاقات.. الأمر مشابه بده، الحب إن زاد عن الحد انقلبَ على صاحبهِ.
خبي حاجة ليك.. شيلها في مكان محدش يعرفه غيرك، حِب بكل ما فيك ألا رُبع مثلاً
