كتب احمد ابراهيم 
بلغنى أبها الملك السعيد
ذو الرأى الرشيد
كان فى قرية زمان يا كرام
ساكن فيها شعب همام
بس يا حول الله يا إخوان
كان يحكمهم ملك خوان
كل همه فى جمع المال
بأى طريقه حرام وحلال
قال للشعب ظروفنا صعيبه
لازم نفرض تانى ضريبه
رد الشعب بصوته الواطى
إحنا لحد إمتى نطاطى
لازم يجى يوم ونثور
كفاية ظلمة نجيب النور
بس لازمنا زعيم الثورة
يقول مطالبنا بعزم وقوة
بعد يومين اختارو زعيم
ايده نظيفه وفكره سليم
زحفو ومشيو لباب القصر
كل أمالهم عزة ونصر
ملك القريه سمع بما كان
حشد الجند والاعوان
الثوار وزعيمهم وصلو
من المنزل افكارهم فصلو
بص زعيمهم شاف العسكر
ويا سلاحهم بيتمختر
إشى دبابة وإشى رشاش
شت دماغه وفكره طاش
وقال بامانه وكل رزانه
يعيش مولانا وبطيخ مولانا
باى حق يا شعب تثور
يلا اتفضل إمشى وغور
وهنا أدركت شهرزاد الصباح
فسكتت عن الكلام المباح
وقالت لمولاها شهريار
ان من أهم أسباب الإنتصار
حسن الإختيار
والى اللقاء فى حلقة قادمة