أراء وقراءات
حكايات شهرزاد الحالمة…حكاية عواد
كتب احمد ابراهيم
بلغنى أيها الملك السعيد
ذو الرأى الرشيد
كان فى زمان جوه البلاد
واحد مصرى اسمة عواد
كان فى حيازتة حتة أرض
يزرع فيها بالطول العرض
ضاقت حبة الدنيا معاة
زنقة وربكة يا ولداه
قال عواد راح ابيع الارض
ارضى انا حر ومهياش عرض
بعد البيعه الناس زفوه
قالو ده ضيع أرض ابوه
راح عواد يشتكى للقاضى
قالو سيبك ده كلام فاضى
مالنا إحنا ومال الناس
ده كلام فاضى مالوهش اساس
وانا هعملك بكره قرار
يمنع اى نقاش وحوار 
بس إبعتلى شوية رز
نفحه وبركه من ريحة العز
ومادام انت بعت الارض
ممكن اطلب منك قرض
اصل ظروفى مش ولا بد
وخلاص كله هيسكت وعد
وهنا أدركت شهرزاد الصباح
فسكتت عن الكلام المباح
وقالت للملك شهريار
ارضك عرضك ما فى نقاش
ومين قال غير كده غشاش
واللى يفرط مره فى شبر
مش راح يوم ينساه الدهر
وإلى اللقاء فى حلقة قادمة
