حوار مع صديقتي بعد انقطاع السنين
كتبت أ.د. نادية حجازي نعمان
بعد إنقطاعنا فترة عن التلاقي أنا وصديقتي التي ارتبطنا معًا ارتباطا وثيقا بعد التعرف عليها أثناء فترة تواجدي بالخارج، دار بيننا الحوار التالي :
السلام عليكم ورحمة الله وبركاته صديقة العمر
وعليكم السلام ورحمة الله وبركاته حبيبة القلب
قلت لها : وحشتيني جدًا روح قلبي… قلت أتصل بيكِ واطمن على أخبارك
ردت صديقتي : إنت كمان واحشاني جدًا ياعيوني …إيه الجديد عندك ؟
سألتها : قولي الأول إيه ده اللي وراك ؟
قالت : قصدك الجلسة؟
قلت لها : لأ ….اللي ع الحيطة
ردت سريعًا : مرايا
سألتها : ياشيخة ده فيهم واحدة تشبه عداد الكهربا….هيه فين المرايات !!!! وهل إنت بتطولي تشوفي نفسك فيهم ؟؟؟ دول فوق أوي .
وجاء ردها : دول مرايا ديكور .
أثار ردها إندهاشي وسألتها : هل قمت بشرائهم بنفسك ؟
أجابتني : لأ…واحدة صاحبتي.
وسألتها : وهل هم عاجبينك ؟؟؟
وردت بما أفادني إنه منظر وخلاص فقالت : أي حاجة.
ولكني أبديت إندهاشي وسألتها : أي حاجة إزاي ؟؟ دول ديكور ولازم تكوني مستمتعة بيهم وشايفاهم حلويين أوي . هل إنت حاساهم ديكور فعلًا !!!
وحاولت أن تقنعني بهم فقالت : مرايا ملونة ديكور .
وأحببت أن أستعيد ذكريات السنين وجمال العشرة بيننا فضحكت وقل لها : أنا شايلة المرارة .
ولكن وصلني ردها يدل على عدم فهم عبارتي وسألتني : يعني إيه شايلة المرارة ؟
وقلت لها : إنتم مش بتستخدموا الجملة دي أبدًا عندكم؟
قالت : لأ …أول مرة أسمعها .
وخاطبت نفسي ولكنها سمعتني وأنا أقول : كويس الحمد لله .
ولكنها أخذها الفضول وسألتني :هيه الجملة دي معناها إيه عندكم ؟
ومع رغبتي في ألا أوصل لها إندهاشي من تعليق شيء للديكور ليس له أي معنى بالنسبة لها
وقررت تغيير مسار الكلام فسألتها : هوه إنت حبيبتي ماتعرفيش المرارة ؟؟ ولا وظايفها !! أنا عايزة أعمل إختبار فى موضوع معنى شايل المرارة لحد من العوام….وألا ماتعرفيش معنى العوام كمان ؟ موضوع إختلاف لهجة العرب ده مشكلة .
وأرسلت لي صورة بلاطة ملونة وسألتني : طيب إيه رأيك ف الديكور ده ؟ ده فوتوشوب.
وأكملت كلامها : ودي أصل الصورة الملونة….عبارة عن قطرات مطر على بلاطة .
أبديت إعجابي بالبلاطة الغير ملونة وقلت لها : الأصل أجمل من الصورة … معبرة أكتر وواضح فيها فعلا قطرات ماء على البلاطة.
جرى الوقت بينا وماعرفناش أخبار بعض .
قلت لها : نتواصل تاني وندردش زي دردشتنا مع بعض من أربعين عام إن شاء الله .
الخميس 11 مارس 2021
