رسالة صادقة من بنت عربيه اتولدت وكبرت في دوله أوروبيه
رساله من المانيا
بل هي رساله من الله عن طريق المانيا..
انا بنت عربيه اتولدت وكبرت في دوله اوروبيه ، ربنا منحني قدر كبير م الجمال كتير كنت بعتبره سبب م اسباب شقائي ، بس لان ربنا مش بيقدر لحد حاجه سيئه اتبدل حالي لنفس السبب وهو جمالي …
اتولدت في بيت #مسلم لكنه ابعد م يكون عن الاسلام كعادة معظم الأسر اللي بتهاجر لدول اوروبيه وبيتركوا الدين وراهم وفي ظنهم ان دا م منطلق #التحضر !!
والدي اتوفى وبعده بشهر والدتي تزوجت واحد غير مسلم وكان انسان بشع وقذر بكل م للكلمه م معنى ، كانت تصرفاته ونظراته ليا مقززه ورغم ان والدتي متأكده م كدا الا انها ولا مره صدته ، ولحظة م حاول يعتدي عليا قررت اني اسيب المدينه كلها واتنقلت لمكان تاني بعيد عن والدتي وزوجها ، ومش هقولك اني عملت كدا لان همي الدفاع عن شرفي لاني ببساطه حبيبتي اتربيت في بيت الاب والام كل واحد ليهم #مرافق ، والاتنين عارفين ان كل واحد فيهم بيخون التاني بس عادي ، بس انا بعدت لاني كنت شايفه ان وقت م اقيم علاقه مع اي شخص لازم تكون بموافقتي مش غصب عني …
المهم اني اتنقلت واتثبت في مدينه تانيه لكن حياتي كانت صعبه وسيئه وكئيبه جدا ، وفي يوم مدير مكتبي واللي كنت متأكده جدا اني م اول لحظه شافني فيها عجبته ، عرض عليا #الزواج !!
استغربت جدا لان ببساطه لو كان عرض عليا اني اكون صديقته بعيدا عن الزواج كنت وافقت ، ولدهشتي يا هدير العظيمه لما سألته ليه عرض عليا الزواج قالي لاني عارف انك #مسلمه !!!!
تخيلي لما انا كـ مسلمه ولا في دماغي احترام لديني وعاداته وحقوقه وواحد #لا_ديني يعني مش بيتبع اي ديانه يكون حريص بالطريقه دي …
قولتله طالما كدا ف انا ديني بيمنعني اتزوج شخص غير مسلم . ومن اول السطر لان الجمله دي كانت سبب ف تغيير حياة ناس كتير … !!
بعد م قولتله الجمله دي اتعجب جدااا وبدأ بسببها يبحث ف الدين لعله يعرف السبب ورا الطلب الغريب دا خاصة اني قولتله ان عادي ان مسلم يتزوج بنت ع غير ديانته …
اللي حصل هو ان بمجرد م بدأ رحلة البحث دي وبدأ ينعزل عن الناس واخد اجازه ومفيش حد عرف عنه حاجه وفجأه ظهر …
ظهر وهو شخص مختلف تمامًا ، شخص هادي لابعد درجه ودايما تايه ومش مركز معانا ،
ورجع بعدها اختفى تاني !!
ومجرد م ظهر سألته ايه اللي حصله وايه سبب اختفاءه ولو غيرت رأيه في موضوع الزواج خاصة انه كان متعجل جدا ، ورد عليا ومن هنا كانت بداية #العجب !!
تخيلي انه قالي ان عرضه بالزواج مازال موجود بس عنده #شرط اساسي .. سألته ايه هو !؟ قالي تلبسي #الحجاب !!
اتعجبت جدا م طلبه بس اندهاشي زاد وقت م عرفت منه ان دخل #الاسلام !!
وقتها حسيت ان عقلي اتشل عن التفكير ومش عارفه افكر ولا مدركه اي حاجه ، ايوه انا طلبت منه لو عاوز يتزوجني انه بدخل الاسلام لكن ابدا م تخيلت ان اسلامه يكون فعلي مش مجرد اسم ف الورق زيي ..
بس اللي حصل حبيبتي ان ربك اراد لهذا القلب #العاصي ان يتوب فـ سبب له الأسباب !!
وافقت ع شرطه وتزوجنا ، وبدأت اعيش معاه حياه تانيه تماما ومختلفه كليةً …
مفيش مره كنا نسمع ان في محاضره او درس في مسجد في ألمانيا الا وكان هو سباق ليها ، وللعلم عمره م فرض عليا اني اروح معاه ،
في البدايه فعلا مكنتش بروح معاه لكن بعد كدا بقيت اصمم انا اني احضر ودا بسبب ملاحظتي لتغييراته الجذريه ،
انا كنت بلاقيه بيسمع القرآن وبيبكي بحُرقه ، ولما بسأله ازاي بتبكي والكلام بالعربي وانت متعرفش ولا كلمه عربي ، كان بيقولي ان الكلام بيخلي جسمه كله #يقشعر وبيحس ان قلبه بينتفض وروحه بتخرج منه ، وآيات معينه بيحس عند سماعها بالطمأنينه وهدوء وسعاده في قلبه …
انا كـ مسلمه كل دا كان جديد عليا ، انا لا عمري سمعت القرآن ولا صومت ولا صليت واسمي مسلمه ، فجأه اعيش مع شخص ولا كان معترف ان في إله م الأساس ويعيش كل الروحانيات دي طب ازااي !؟.
حضرت معاه اكتر م درس ومحاضره لكن ولا مره حسيت بتغير فيا ، طيب اشمعنى هو !!؟
بس عرفت اجابة سؤالي م توالي ملاحظتي لزوجي وانهماكه في تعلم كل شئ عن ربنا وعن سيدنا محمد وعن الاسلام واحكامه …
زوجي اللي كان مش معترف بوجود ربنا اصبح في ظرف سنه ونص م مكوثه ومداومته ع القرآن اصبح #خاتم_للقرآن مش هقولك كان حفظه بالكامل بالتفسير وع الرغم انه حفظه بالتلقين الا اني كنت كتير بحس انه فاهم كل كلمه ،
كنت بسمع صوته وهو بيقرأ القرآن وبيبكي عند آيات العذاب وبينهار م البكاء عند آيات التوبه ووصف الجنه وكان بيقوم يسجد لله …
منين اتعلم زوجي سجدات الشكر لله وانا كـ مسلمه ولا مره سجدت شكر لله !!؟
وفي يوم صحيت م النوم ع صوته وهو بيصرخ اتخضيت جدا ، ومجرد م نظرت ليه لقيته بيبكي بهيستريا وبيقولي انه رآه اخيرًا ..
سألته مين هو !!؟ قالي انه اطمن انه ع الطريق الصحيح وانه متعجل جدا للقاءه في الاخره ، كررت سؤالي مين هو قالي #مُحمد !!!
قولي عليا اي حاجه بس صدقيني كان صعب يخطر ع بالي جدا ان محمد اللي يقصده هو سيدنا محمد !!!
زوجي اصبح عاااشق لسيدنا محمد لدرجة كان منتظر قدوم اول طفل لينا بشوق رهيب لمجرد انه يسميه ع اسم سيدنا مُحمد !!
كنت بشوف زوجي #طفل صغير م بداية تعلمه للقرآن وانه كان #بيتهته وهو بيقرأه ومع ذلك مصمم انه يحفظه !!
كان صعب اعيش معاه ومتأثرش بصراحه خاصةً بإن كل حاجه #حلوه كان بيعملها معايا كنت لما اشكره عليها ، يقولي انه اتعلمها م الدين ومعاملة سيدنا محمد لزوجاته !!
انتِ متخيله اني كـ مسلمه معرفش كلمه عن ديني وبالتالي مش بحبه ولا بكرهه بس يكون سبب م قربي م ربنا وتعلم ديني واعطاءه حق قدره هو زوجي ،
متخيله اصلا ان سبب التغيير الجذري دا هو مجرد بحث عن سبب حرمانية زواج المسلمه م شخص غير مسلم ، البحث وصله لحاجات تانيه كتيير ،
بإختصار وصله لـ #ربنا !!
ياااه لو تشوفي زوجي وهو بيصلي او بيقرأ القرآن ، وربي حتى يومنا هذا م قرأ القرآن قط الا وبكى !!
ولووووو تشوفيه وهو بيستعد للصلاه وخاصةً #قيام_الليل !!
زوجي كتير بحس انه اللهم بارك حريص ع الدين اكثر م اي مسلم ولد ع الدين .. بيدافع عنه قدام اي حد ، وعمره م تطاول ع حد في الكلام مهما بلغت اساءة الشخص اللي قدامه ، ع الرغم ان طباعه قبل الاسلام كانت سيئه جدا ، الا انه كان دايمًا يقولي ان اخلاقه بتظهر معدن وقيمة وتأثير تدينه ، وان الرسول علمنا السماحه وان مجرد التبسم هو في حد ذاته صدقه …
زوجي كان كل م نكون في تجمع يبدأ يتكلم مع الناس عن الاسلام ويحكي قصة اسلامه وتغيره الكلي والجذري ، وسبحان #الهادي ناس كتير كانت بتتأثر م كلام زوجي ومنهم اللهم بارك ياربي كتير دخلوا الاسلام ،
ولو تشوفي فرحته لحظة دخول شخص للإسلام حتى لو مش بسببه الا انه كان بيبكي ويسجد شكر لربنا ويردد ان الحمد لله ان ربنا اراد للشخص دا انه يفلت م نار جهنم !!!
صدقيني لو قولتلك اننا كـ مسلمين عايشين في دول اوروبيه ف اغلبنا الا م رحم ربي فهو بيمثل صوره سيئه جدا عن الدين ، واشهد ربي ان م في شخص دخل الاسلام الا واعطاه حق قدره لدرجة تبكي الحجر …
قولتلك ان حياة اشخاص كتير بسبب اسلام زوجي اتغيرت وهما انا وابنائي وكل شخص عرف الاسلام بسببه ومازال زوجي مستمر للدعوه للإسلام …
شئ محزن اوي لما بنتابع اخبار دول المفروض انها #مسلمه وبنلاقي انها بتاخد م الاوروبيين اسوأ م فيهم وهو حب الموضه والمظاهر والتكلف ، رغم انك لو اتعاملتي مع كتير م الاوروبيين هتلاقيهم مختلفين عن كل دا لدرجة انك ممكن تظني وانتِ بتتكلمي مع حد منهم انه مسلم ، علشان كدا دخول الاسلام لقلوبهم بيكون اسهل ..
دي ناس بإختصار بتسمع الكلام بتفكر وتستخدم #عقلها ، في حين انك علشان تقنعي مسلم بوجهة نظرك بتكرهي نفسك انك فكرتي تتكلمي معاه ….
وبندهش جدا لما مسلم وفي بلد مسلمه يتحجج بما حوله م ابتلاءات ، طيب احنا كـ ناس عايشه في وسط قله قليله مسلمه بالنسبه لعددكم نقول ايه !؟ وبالنسبه ان الدين الاسلامي تحديدا اصبح محارب في دول كتير ، هل يا ترى نتحجج بكدا !؟
ربنا يتقبل توبتنا جميعا ويهدينا إليه ويحفظ لي زوجي الذي كان سبب في كل جميل دخل حياتي
ودي بإختصار قصتي او قصة هدايتنا … !!
اسلامنا جميل وقرآننا جميل ورسولنا الحبيب جميل والله جميل ، لكننا نحن #المشوهون …. !!
نتعجل ارزاقنا ونتمرد ونسخط ع اقدار الله لنا ، ع الرغم ان ولا واحدٍ منا يستطيع القول بأنه قد اعطى لله حق قدره وحق عبادته !!!
احنا طلعنا بجحين اووووي مع ربنا وهو مع ذلك كريم ومازال بيعطينا ومازلنا نتمرد عليه ..
مازال يرسل لنا دلالات رحمته ومعجزاته ومازلنا ننكرها بكل تبجح .. وغيرنا يلهث وراء البحث عنه بمجرد ان يرسل رساله إليه ..
مازال يبعث لنا بمن يهدينا لطريقه ومازلنا في غفلتنا نعصيه وتُلهينا شهوات دنيانا ع التمتع بقُربه في الدنيا ، ولو ظللنا ع حالنا لحرمنا هو التمتع بقُربه في الآخره …
كل واحد دلوقتي بعيد عن ربنا يسأل نفسه ايييه الحجه اللي هيقولها لربنا وقت م يقف بين يديه !!
امتى بجد هنفضل نحارب بعض كـ مسلمين ويكون كل انشغالنا اننانسب ونلعن في بعض ولو سمعنا عن ان شخص اللهم بارك عليه كويس جدا مع ربنا او نس بتربي ولادها صح نقول ان الناس دي مش موجوده ، لمجرد اننا نريح ضمايرنا واننا كلنا في الهوا سوا ،
ومهملييين جدا فب حق القرآن وغيرنا لغته ابعد م تكون عن لغة القرآن ومع ذلك بيصمم ع حفظه لعله يحفظه يوم القيامه.
ونحن مازلنا في غفلتنا !!
فـ اللهم انك تعلم ان قلوبنا #هشه ونعلم نحن اننا نعصيك جهارًا نهارًا ولكن ربي لا تقبض قلوبنا الا وقد هديتنا ورضيت عنا.
مختارة من صفحة الدكتور سعد كامل أستاذ مشارك في الجيولوجيا
