الفن والثقافة
رسالة ل سيدى شبل (أمير الجيوش)
بقلم/ يسرى زكى
الجمعة 19 يونية 2020
عبر الشاعر “يسرى زكى” ابن مركز أشمون محافظة المنوفية عن حبه وتقديره لأهل مركز الشهداء
وتقديره للأستاذ “مجدى رياض” رئيس مركز ومدينة الشهداء وبخاصة أن المدينة
بها مسجد سيدى شبل (محمد بن شبل بن الفضل) عم “النبى” والذى استشهد وعمره ٣١عام
وهو يقاتل الرومان والذى لقب بأمير الجيوش الإسلامية.
طَعَنتِنِي بالوردة
سَال العِطر من روحي
كل المُدُن فَتَحِت بِيبَانها للمَدَد
واللي صِحِي مَفتُون….. ناداه الحق
والقاسي داب حِنِّية علي بَابَك
واتمَدِّد الحُضن الوسيع….. فَاضيَّق
صَرَخِت عِظَامِي اتكَسَّرت فِيَّا
عَزَلِتنِي عن شوفِي لمَدَي نورك
وبَنَت جَدار علي عُزلِتِي….. فانشَق
يا ااااااااااطيبين
ياااااااطيبين
ناديت ونَزِّلت (الكِمَامَة)
من علي صوتي الحزين
ناديت…
حصان صوتي انجرح
وصهل أنين
قوم يا أمير من مَشهَدَك
وارمي العباية ع الغلابةالقلقانين
من عتمة الليل اللي راقد
وِسطِنا ف نفس السرير
قوم يا أمير
لحد ما الموت يختِشِي
ويفُك خيمته اللي فَرَدها ع الصُغَيَّر والكبير
ويفُكِّنا…. ويغُور
الليل بيِستَهفَى اللُّمَض والكهربا
وبيترعب لما الصباح ييجي ف إيديه النور
هابني مقام للطب
واقرا في المقام الوِرد للدرويش و للدكتور
العِلم شَافِي للشجر
والبذرة في إدين الوَلِي
تطرح شَجَر جُوَّا الأَرَاضِي البُور
نِقرا ب إسم اللي خلق
نرسم سلالم ع الحقيقة وعا الورق
نِطلَع عليها نبُص فوق السور
احنا كدا
بنرُش ايدنا بالكحول
وبنرفع الإيد للسما
ريحة الكحول بتترمي ع الارض
وتبوس ف رجلين البخور
