رَهْن أمْرِك .. إطلبى تِلْقينى جَايٍٍٍِِبْ
الشاعر المبدع الشحات النقيدي الملقب بشاعر الوطن يهدي أمه في عيدها هذا القصيدة
يقول فيها بكل المشاعر الصادقة لابن بار :
قولى يا سِت الحبايب
إنتى عايزة منِّى إيه ؟
إطلبى تِلْقينى جايب
لاجلِك الكون باللى فيه
تؤمرينى رَهْن أمْرِك
ضِيفِى عمرى دَهْ لِعُمْرِك
مش راح أعصَى يوم أوامرِك
بَعْدِك انتى حَ أسْوَى إيه ؟
قولى يا سِت الحبايب
إنتى عايزة منِّى إيه ؟
………..
إطلبى يا غالية قولى
أى حاجة ما تخافيش
ياما شيلتى كتير حُمُولِى
كُنتى نفسِك إنِّى أعيش
مش ناسيلِك حاجة يامَّا
دى حاجات ما بتِتْنسيش
بس فيه اللى أحكى عَنُّه
وفيه حاجات ما بتتحكيش
فاسمحى للقلب يكتب
أو يقولِّك ع اللى فيه
قولى يا سِت الحبايب
إنتى عايزة منِّى إيه ؟
………..
ما تفكِّريش اليوم دَه يومِك
ده انتى ليكى كل يوم
يللِّى أفراحنا فْ قُدُومِك
والفَرَح بيكى يِدُوم
ده انتى يامَّا ساترة دارنا
والكرَم مبنى فْ جَدَارْنا
والضيوف لو تيجى دارنا
ينسوا وسطينا الهموم
رغم إن العين بصيرة
والإيد كما قالوا قصيرة
بس سيرتِك أحلى سيرة
كلِّك شهامة وحاضرة فى وقت اللزوم
كُل واجب مادَّة إيدِك
واهبة كل الخلق عيدِك
كُل قلب الناس يِريدِك
يا أم عقل كتير نبيه
قولى يا سِت الحبايب
إنتى عايزة منِّى إيه ؟
………..
أى حاجة تطلبيها
لاجلِك انتى مش كتير
كل دنيانا وما فيها
تقول بإنِّك وِشْ خِير
عمرنا ويَّاكى يامَّا
رغم الحياة ما احتاجنا حَدْ
عِشْتى ويَّانا بِهِمَّة
والحياة واخداها جَدْ
حتى كان فى وجود أبويا
بأشوف صِفات لم ليها عَدْ
ده انتى من يومِك عفيفة
فى الحياة عايشة وشريفة
والإيدين طاهرَة ونِضيفَة
وقلب للمخاليق يِوِد
والجراءة والفصاحة
والبراءة والنصاحة
خلُّوا عَندك للتساؤل ألف رَدْ
ده انتى يامَّا قلب طيِّب
اللى يعرف بيه يقول الله عليه
قولى يا سِت الحبايب
إنتى عايزة منِّى إيه ؟
********
الشحـ النقيدى ــات
شاعر الوطن
