ليه من العيد زعلانين وقلقانين منه وخايفين علشان كورونا وكل اللي منها ماتو؟
ولا علشان قفل الجوامع وبهجة التراويح اللي راحت ولا علشان العزومات اللي اتحرمنا منها في رمضان ولمتنا اللي تاهت مننا ولا علشان اقتصاد العالم اللي اتكسر والمصانع اللي اتقفلت ولا علشان امي ماتت وده اول عيد ليا من غير ضمتها وحضنها وبسمتها ولا علشان قلقنا على ولادنا في الرايحة والجاية ولا علشان مرعوبين احسن نكون السبب في ضياع أغلى حبايبنا.
طب ماتيجو نفكر صح
لو فكرنا نفرح بالعيد علشان لسه بنتنفس وعلشان الشمس لسه بتطلع و علشان عدا علينا رمضان وكسبنا ثواب صيامة وقيامه حتى في بيوتنا و علشان لينا بيوت بنتحامي فيها وغيرنا مش لاقيها و علشان صحتنا اللي ربنا أنعم بيها علينا وغيرنا مش لاقيها وعلشان صحينا من النوم وعندنا فرصة نصحح أخطائنا وندعي لموتانا امي وامك ابويا وابوك اختي واختك اخويا واخوك.
مش لازم ننكر إننا في محنة ولا ننكر أن المحنة قربتنا من بعض وعرفتنا الأصيل من قليل الأصل والرخيص من الغالي صدقوني لسه عندنا الفرصه نعوض اللي راح طالما فينا نفس. المحنة إختبار من ربنا لينا وامتحان يلا نحاول ننجح فيه لو ربنا اخد منا بعض الأشياء اللي بنحبها لكنه سبحانه وتعالى ادانا كتييييييير لازم نشكره عليه اللي اخد منه جزء من صحته فلازم يشكره على الجزء اللي سابه ليه لو ربنا اخد بعض من أحبابنا فلازم نشكره على باقي أحبابنا اللي حوالينا غيرنا ما عندهم صحة، غيرنا ما عندهم قوت يومهم غيرنا ما عندهم أهل، غيرنا مشردين ما ليهم مأوى.
غلط نحس بالحسرة واليأس لكن الصح نحس بالأمل ونشكر ربنا إنه بيساعدنا وبينبهنا وبيدينا الفرص علشان نقرب منه بعد ما بعدنا عنه وكمان بيدينا الفرص علشان نصلح أخطائنا يلا نحول دموعنا من دموع ألم وحسرة لدموع امل وشكر لله وكفاية اننا دلوقتي بنقول لبعض…. كل سنة وانتم طيبين.
