ستات قوية ومفترية
بقلم / أمل الوكيل
فيه ساعات كده بنحكم على الناس بالظاهر وبس وبننسى حتى نتعب نفسنا ونفكر شوية ، زى النهاردة كده وانا قاعدة لابيا ولا عليا لقيت ست في الاربعينات ماشية بقوة كده وجوزها وراها بمسافة بسيطة شكلها قوية وشكله ضعيف صراحة ماعجبنيش المنظر وقلت ستات قوية ومفترية
عدى عليا الموقف ده كتير وعلشان كده مابقاش فارق معايا المهم قلت ارتاح شوية من الشغل ووقفت اشرب شاى وبتفرج على الناس لقيت الست اللى انا افتكرتها قوية ومفترية بتقول لجوزها انا سبقتك وخلصت كذا وروحت لفلان علشان كذا ورجعت البنت من الدرس ويالا بقى علشان الحق اخلص الغدا
والله العظيم انا اللى مفترية علشان ماقدرتش افهم بسرعة ان خطواتها سابقة علشان حملها تقيل .ماشية بسرعة علشان تخلص الحمل بسرعة .!!!!
قوية بس مش مفترية لانها بتحاول تشيل عن جوزها الحمل بس وجوده منظر اجتماعى لابد منه
الخلاصة اوعوا تحكموا على الناس من الظاهر وبس فكروا ولو بربع جنيه.
