ستى قالتلي
كتبت / عزه السيد
ستى قالتلى خدى منى النصايح دى هتفيدك ف المطبخ وتفرق ف طعم أكلك
١_ الباذنجان المخلل ضيفي بقدونس مفروم مع التوم بيدى طعم حلو جدا
٢_ ملعقة سكر صغيرة في صلصة المكرونة عشان متعملش حموضة
٣_ البطاطس قبل ماتحمريها اسلقيها خمس دقائق في ميه وملح ومعلقة خل بتقرمش ومش بتشرب زيت
٤_ قشر الليمون مترميهوش حطيه ف سائل غسيل المواعين بيدى لمعة وريحة جميلة
٥_لو عندك اكله محتاجة كريمة وملقتيش ذوبي معلقتين زبدة مع لبن كامل الدسم ومعلقه ص نشا واستخدميهم وهيبقي عندك كريمة طبيعية
٦_وانتي بتقلي البانيه حطي ملعقة زبدة مع الزيت هيبقي زي المطاعم
٧_حطي معلقه عسل اسود او سكر صغيرة
في تتبيلة الفراخ المشوية بتدى طعم حلو ولون للفراخ رائع
٨_حطي زبادي في تتبيلة البانيه بيخلية طرى ومستوى كويس
٩_ ادعكي الفراخ ببصلة وملح وفلفل وقيل من الزنجبيل الفراخ قبل السلق عشان يبقى ليها طعم وريحة ومتبقاش زفرة
١٠_ الرز باللبن ضيفي كيس كريم شانتيه هيخلى الطعم جامد وزى بتاع برة بالظبط
١١_ رشي دقيق و ملح علي بصل الكشري قبل التحمير علشان يكون مقرمش
١٢_رشة زعتر علي صلصة المكرونة بتدى ريحة حلو وطعم مميز
١٣_حطي بيكنج صودا علي عجينة الكفته المشوية ميخلهاش تكش وتكون منفوشة زى ما هى
١٤_ تشوح اللحم في السمنه وحبهان وورق لورا وبصل قبل السلق نديها صدمة فعلا بيفرق جداا فطعمها وطعم الشوربة
١٥ _الرز الابيض شوحي مستكة وحبهان في السمن قبل الرز هيخلى طعمه يجنن ولما تنزلي ب بالرز ضيفى ملعقه خل ابيض هيخلى الرز لونه ابيض زى الحليب
١٦_لاحلي صلصة مكرونة اضربي مع الطماطم توم و فلفل رومي وفلفل حامي وشوفي طعمها حلو ازاي
١٧ _ إدهني الفراخ و البط بصلصة وملح وفلفل ولمون قبل ما تحطيها فى الفرن هيخليها لونها حلو
١٨_ محشي الكرنب سخني حته زبدة وحطيها عليه قبل ما يتشرب بشوية عشان يبقى بيلمع وطعمة جميل.
