ست البيت.. كلام فى سرك.
كتبت / عزه السيد
عايزين النهاردة نتكلم عن كام حاجه مهمه في البيت
الخل ده بالنسبالي من أهم الحاجات اللي مقدرش استغني عنها بستخدمه في حاجات كتير بعد ما بغسل الخضار تنقعيه في الخل دقايق بيموت أي حاجه وكمان بنضف بيه الفراخ.
بحط من الخل في طبق الليفه اللى بغسل بيه المواعين بيطهر ويلمع
بحط منه في مايه المسح واتفرجي على الأرض.
وكمان كل مده تعملي دوره بالخل للغساله بيحافظ جدا عليها
انا كمان بحط معلقة علي بيض الكيكة علشان الزفاره وكمان يخليها هشه.
و لو بتعملي رز ابيض حطي معلقة صغيره خل واتفرجي علي البياض وما يخليهوش يلزق
شكا أن ورا دولابك أو فوقيه فار أو في حتت مش بتعرفي تطوليها اقولك سر خطييير النعناع ايوه ما تستغربيش الفيران بتكره جدا ريحة النعناع هاتي نعناع ممكن تنشفيه أو زي ما هو مش هتفرق وارمي في الأماكن دي منه يطفشهم ومنه هيخلي ريحة البيت حلوه
الشتا جه وناس للأسف ما بتفتحش تهوي كتير هاتي ريحان عرفاه ريحته تحفة وبيتباع ناشف عند العطار وحطي بين المراتب والأماكن المقفوله الضيقة أي حشرات السرير والحاجات دي ما بتحبش ريحته
