سيد عبد الحفيظ يحرز قاضية جديدة في مواجهة احمد عفيفي
كتب/ هاني حسبو.
تابع عشاق الساحرة المستديرة أمس السبت الثاني والعشرين من يونيه 2024 تلك المناظرة الهامة التي جمعت كابتن سيد عبد الحفيظ نجم الأهلي ومدير الكرة السابق وأحمد عفيفي المحلل الرياضي و الزملكاوي الهوية ببرنامج الكورة مع فايق على قناة ام بي سي مصر 2.
اجمع القاصي والداني على تفوق عبد الحفيظ الهائل وقدراته الفائقة و ذاكرته الفولاذية التي جعلت هناك قاضية جديدة بعد قاضية مجدي أفشة.
أبرز تحليل لنتائج هذه المناظرة ما قاله محمد فارس الإعلامي الأهلاوي حيث قال:
فكرة ال Debating اللي هي المناظرة في العالم كله التفوق فيها معتمد على أنك تبعد عن العبارات العامة أو القوالب اللفظية الغير تفصيلية لإنها هتضعف موقفك لإن المناظرة التفوق فيها مبني على أكبر كم من الحقائق التفصيلية كل ما هيكون موقفك قوي وكل ما يكون كلامك معتمد على جمل عامة كل ما هيكون موقفك ضعيف
كابتن سيد رجل بيمتلك أدواته وذاكرة قوية في مواجهة اجتزاء وعبارات عامة عن المظلومية بدون ذكر أي سياق كامل
وللأمانة رد فعل قطاع كبير من الزمالكاوية على المناظرة هو تجسيد لحالة الإنكار كحيلة دفاعية نفسية للهروب من الواقع اللي اتقال
تخيل طرف بيتكلم عن تضارب المصالح في وجود كابتن حسن حمدي وبيتجاهل تواجد حيدر باشا كرئيس للزمالك ولاتحاد الكرة
تكلم عن مجاملة الحكام للأهلي وبيتجاهل ان مصطلح زي الأحتواء في واقعة محمد عادل وروح البروتوكول في واقعة أمين عمر هي وقائع حصلت مع الأهلي ، بيتجاهل المستشار عايز بطولة وتعيين محمد فاروق في اخر مباراة له كحكم ورفض استقدام حكم اجنبي لنهائي الكأس أمام سموحة عشان يتجاهل دفعة كاسونجو في هدف ياخد بيه الزمالك الكأس ويلعب بسببه الكونفدرالية اللي هي كمان بيحققها بخطأ فادح من بملاك تسيما في النهائي أمام نهضة بركان لدرجة إن لقجع نزل ضربه بالقلم ، بيدي مثال للمجاملات بجهاد جريشة اللي وجيه أحمد قال عنه جبناله الحكم اللي بيحبه ، وبيتجاهل إن جهاد جريشة ده مرتين يطلع يعتذر عن اخطاء له في مباريات الأهلي
بيتكلم عن المؤجلات وبيتجاهل إن مرتضى قال انا أجلت الدوري كله عشان فرجاني كان مصاب وبيتجاهل تأجيل مباريات للزمالك الموسم الحالي بالمخالفة للوائح زي مباراة فاركو والبلدية
بيتكلم عن نادي القرن بمنطق وحيد ال ٩ أكبر من ال ٧ وبيتجاهل المعايير اللي اتحطت في توقيت الأهلي كان متفوق فيه على مستوى البطولات والنقاط يعني مكنش في أي منطق لمجاملة الأهلي اللي اتظلم في سوبر ٩٤ وانسحب من البطولات الأفريقية نتيجة ايقاف كابتن طارق سليم وابراهيم حسن
كلام عفيفي في المناظرة ميختلفش كتير عن موقف الزمالك الحالي في رفض لعب مباراة الأهلي نفس المنهج شعارات عن العدالة والحق وتكافؤ الفرص ورفض المظلومية بس لو انت مذاكر وهتواجه ده بالحقيقة والتفاصيل هتكتشف انك قدام كلام من غير أي منطق وأبعد ما يكون عن الشعارات اللي هي مجرد أوهام .
ممكن يختلف الشخص وطريقة التعبير إنما الكل بيردد كلام هو نتاج عقل جمعي واحد عايش تحت رحمة أكذوبة كبيرة هي السبب الأساسي في اللي وصل له الزمالك على مدار سنوات.
