من فتره اتشرخت عندى كوبايه وانا بصب فيها شاى وعلشان هى جامده شويه وازازها سميك فكملت استعمالها ، وفى كل مره كنت اصب فيها حاجه سخنه كنت بكون متأكده انها هتنكسر بس الاقيها مكمله ، قولت خلاص هى جامده مش هيجرالها حاجه واديتها الامان ونسيت الشرخ ده لحد لما لاقتها فجأه وانا بصب الشاى سمعت صوت الشرخ بيزيد فكرت بسرعه الحق الموقف لكن ملحقتش انقذ الموقف من البهدلة. الكوبايه ديه بالظبط شبهنا وشبه العلاقات البشرية، فكرة انك تجرح حد وتلاقيه مستحمل مرار السنين ومكمل ومتعايش ده مش معناه ان جرحه خف بالعكس الجرح جواه بيكبر وانت مش واخد بالك ومع الوقت وتحاملك عليه هيجى يوم وينفجر فى وشك ومش هتقدر تتصرف
