صفقة انتقال “زيزو” هل نجحت منظومة الأهلي تسويقيا ؟
المنظومة الوحيدة الكروية اللي في مصر بتشتغل بمعايير عالمية حقيقية … هي النادي الأهلي.
—
🎬 المشهد الأول: صفقة زيزو
زيزو؟ ده مش مجرد “لاعب انتقل”…
زيزو اتاخد من الزمالك بـ”الريموت”، من غير مفاوضات علنية، من غير دوشة، من غير حتى صورة في التمرين.
الناس صحيت لقت زيزو بيقول:
“شكرًا جماهير الزمالك… التجربة خلصت.”
وإحنا اتصدمنا… مش عشان مشينا لاعب،
لكن عشان مفيش حاجة في منظومتنا كانت جاهزة، حتى للبيان.
برغم التسريبات اللى بقالها ٣ شهور
—
📦 المشهد التاني: المنتج اسمه “زيزو”
🎯 الفيديو؟ مش “تقديم لاعب”… ده Launch Campaign كاملة!
فيديو زيزو جاب 26 مليون مشاهدة في أقل من 24 ساعة… وده رقم مرعب.
إعلان فيه دراما، صوت، هوية بصرية، وإنتاج سينمائي… كله بيقول: “أنا مؤسسة فاهمة هي بتعمل إيه”.
أنا مشوفتش صفقة انتقال لاعب مصري اتقدمت بالشكل ده قبل كده
الفرق بيننا وبينهم؟
إحنا كنا شايفين زيزو “لاعب كويس”،
هم شافوه منتج جاهز للبيع، والتقديم، والترويج، والإعلانات.
استخدموا اسمه كمحتوى رقمي.
دمجوه في خطة إعلامية كاملة.
عملوله Launch زي البراندات:
فيديو بحبكة،
إنتاج سينمائي،
ظهور في برنامج “الكورة مع فايق”،
حتى حسابه الشخصي دخل اللعبة.
ده مش تقديم لاعب… ده تسويق عالمي.
—
📈 المشهد التالت: الفلوس رجعت قبل ما يلمس الكورة
في عالم الماركتينج، بنتكلم عن ROI (Return on Investment)…
يعني أنت دفعت كام؟ وجالك كام؟
الأهلي جاب لاعب بمبلغ كبير، آه…
بس:
العوائد الإعلانية من الرعاة + الفيديوهات = عشرات الملايين
التفاعل الجماهيري = نار
الرعاة فرحانين
الجمهور مبسوط
الزمالك؟ محتار يقول إيه
يعني من الآخر:
الأهلي كسب “فلوس”، و”قوة علامة”، و”رواية إعلامية”… من أول يوم.
—
🏗️ المشهد الرابع: المنظومة اللي اسمها “الأهلي”
اللي حصل مش صدفة… ومش بس عشان فلوس.
اللي حصل ورا شغل سنين:
مؤسسة بتخطط
ناس فاهمة الجمهور
إدارة بتفهم في التفاوض
جهاز بيطلب لاعب، ولجنة بترتبله حملة
واللاعب نفسه داخل المنظومة دي وهو عارف هو رايح فين
الأهلي حط نموذج في مصر محدش وصله: منظومة رياضية متكاملة بتشتغل بفكر شركات البراند العالمية.
—
💬 الختام: أنا زملكاوي، وقلبي محروق…
بس دماغي بتفهم يعني إيه “نجاح تسويقي”.
صفقة زيزو ما كانتش ضربة في ملعبنا بس…
كانت درس بيقولنا:
يا تبقى “نادي بمنظومة”… يا تفضل “كيان بالعافية”.
إحنا بنخسر لاعيبة مش عشان معندناش فلوس…
إحنا بنخسر لأننا مش جاهزين نحافظ حتى على اللي عندنا.
—
👏 للأهلاوية: فرحتكم مش بمجرد بلاي ميكر جديد
دي صفقة بتقول: “احنا النادي الأهلى إحنا التاريخ.”
💡 للزملكاوية: مش وقت نغلط في زيزو…
ده وقت نسأل نفسنا: “هو ليه سابنا بسهولة كده؟”
🎯 وللي شغال في الماركتينج زيي؟
خد نفس، وركّز:
الكرة بقت بيزنس … واللي مش فاهم، هيتفرج.
🗣️ وفالاخر عايز تزعل؟ ازعل.
بس لازم تتعلم!
اللي حصل مع زيزو مش “خيانة”…
اللي حصل درس في التسويق، في التخطيط، وفي السيطرة على الرواية الإعلامية.
مختارة من حساب “احمد القصراوي” من كبار مشجعي الزمالك على فيسبوك
