د.فكرى بسطا ..عضة الكلب والقطة ليست سموم

مصل التيتانوس لكل ماهو فوق 11 سنة

كتب – وليد على

يسأل الكثير من الناس ماذا افعل لو ابنى عضة كلب او القطة او الفار او الحمار وهل هذه سموم وهنا مع طبيبك الخاص يجيب الدكتور فكرى باسط استشارى الباطنة والكبد والجهاز الهضمى

اول حاجة تجرى على اقرب مستشفى حميات علشان تاخد مصل السعار وكل ما كان بدرى كان احسن المفروض فى أول 6 ساعات بس لو عدت الست ساعات ممكن ندى لغاية 24 ساعة بس بعد اول ست ساعات النتيجة مش مية فى المية

اولا

لو العضة فى الوجه أو الرقبة أو الصدر دى اخطر حاجة لازم المصل و ندى امينوجلوبين فى مكان العضة وارجوك فى اول ست ساعات.

المشكلة الواحد يتعض ينزل على الفيس صورة والعضة واخد المصل ولا لا لو سمحت وفر وقت سؤالك وروح خد المصل وبدل ما تسال على الفيس روح اسال دكتور مستشفى الحميات القريبة منك.

ثانيا

عضة الكلب بيتى أو من الشارع. متضيعش وقتك ووقتنا لو انت مطعم كلبك وضامن أنه مابيخرجش بره ومش عايز تاخد المصل براحتك.بس ضميرى مش هاقدر اقولك ماتخدش لان لو واحد فى المليون الكلب مسعور ملهاش علاج ولا حل .الحل الوحيد المصل لأن مافيش علاج.

ثالثا

المصل بيتعطى للحامل والرضع ولاى حد لان لو فى اعراض جانبية لا تقارن بمرض السعار اللى ممكن المريض يتعرض له

رابعا

لازم يتعطى أيضا مصل التيتانوس لكل ماهو فوق 11 سنة اللى أقل من 11 سنة لسة عنده مناعة ضد التيتانوس نتيجة للتطعيم وهو بيبى.

خامسا

طيب لو خربشة برضة روح المستشفى والدكتور هو اللى يقدر يقولك تاخد مصل ولا لا حسب عمق الخربشة.

سادسا

لو المريض جاله هيجان وخوف من المية وخوف من الحموم ومش قادر ياكل ومش قادر يشرب كده المريض جاله سعار ولازم كل البيت والمقربين يتطعموا  لان مريض السعار معدى عن طريق اللعاب .

ده مرض معدى وربنا يحمينا منه وكده المريض ميت ميت للاسف لا محاله

سابعا

تربية كلب أو قطه مستهلكة للنفس والجسد ومحتاجة رعاية كبيرة خاصة لو عندك اطفال لازم الحيوانات تتطعم  ولازم تاخد بالك لو عيل اتعض لا سامح الله. لو مش قادر تعمل كدا يبقى ماتربيش حاجه.

احكيلكم حكاية مرة واحد ضابط شرطة كان حالق دقنه بالموس وكان عنده كلب للاسف الكلب كان عنده سعاروالضابط ما يعرفش الكلب لحسه فى وشه الفيروس بتاع السعار دخل من العاب عن طريق الجروح مكان الحلاقة إلى جسم ودم  الضابط والراجل ماهتمش فطبعا للاسف أصيب بالسعار فى خلال اسبوعين ومات.

الخلاصة عضة خربشة لحسة روح للدكتور فى اول ست ساعات وهو يقدر يقيم الحالة ماتضيعش وقتك انها لعبة الموت.

ربنا يحميكم ويحمينا