طول ما انت عايش حتفضل تتعلم .

من اختيارات أ.د.نادية حجازي نعمان

حتتعلم إن مش كل حاجة حلوه لازم تدوم…حتتعلم إن في ناس هتكون مراحل في حياتك هتيجي لغرض يعلمه الله وهتمشي .. حتتعلم مين إللي تبكي على كتفه وهتتعلم إن سعات لازم تمسح دموعك بإيدك انت وبس..

حتتعلمتحب وهتتعلم تفارق وتفقد جزء من روحك وتكمل.. هتتعلم من الناس إللي جرحتك وخذلتك وهتتعلم من إللي إنت جرحتهم..وهتشوف الدنيا وهي بتدور وتعلمك إن الشيء الوحيد الأكيد إن مفيش حال بيدوم..

هتتعلم يعني إيه ثقة ويعني إيه جدعنه واصول والدروس دي هتتعلمها من الخاين والندل وقليل الاصل قبل الصاحب الجدع ابن الاصول.. هتتعلم إنك تعيش بشوية تشوهات جوا نفسك بس عادي ،مش عادي !! كله خير..

هتتعلم إنك لسه قدامك كتير ولازم تفضل تربي نفسك..وكل ما تتعلم ، هتدرك إنك أمام علم الله قليل جدًا..

هتتعلم إن في ناس في حياتك مينفعش تسيبها لازم تتبت فيهم بإيدك وسنانك علشان الناس دي مبتتعوضش..وهتتعلم إنك سعات لازم تفتح الطريق للي عايز يمشي..وإنت قلبك راضي وماشي في سكتك..

ومن أكبر الحاجات الي لازم تتعلمها إنك تسامح نفسك وتسامح إللي حواليك..وتتعلم إن أكبر كنز لك هي أعمالك الخالصة لله..وإن كان اتكتب عليك تعافر..ف ربنا يكتب لك إنك تعافر في السكة الصح ومع الناس الصح وعلشان الهدف الصح

٢٠٢١/٨/٨