أراء وقراءات
عارفة يا اما
كتب / سيد غريب
عارفة يا اما
أنا حاسس إن الموت
ما خدش منك غير الطرحه
والجلابيه السودة
ما أنا كل ما عدي جنب الاوضة
أسمع صوتك
وأنتى بتضحكى ع الدنيا
وبتدعي لى
روح ربنا معاك
هتسافر
وهترجع مجبور الخاطر
وهستناك
طب إسندى على كتفى
بكره تقومى
بكره تخفى
**
عارف مين يا بنى بيقع ويقوم
أوعى تدور ع الدفا
فى فلوس وهدوم
ومتنساش تحوش شوية أصحاب
وافرح أوى لما يدق الباب
وتلاقى حد بيحضنك
لوجه الله
ياه
**
فاكره ياما لما كنتى
تعملى البصاره
وتدى منها لأبله سارة
يرجع الطبق رز بلبن
يروح لأم حسن
يرجع صنية بسيسة
تدى منها لخالتى بيسة
ويرجع الطبق مليان حب
معقول كل ده قلب
**
عارفه يامه
النهارده بقيت بخاف بجد
بخاف من أى حاجه
ومن أى حد
بخاف غصب عنى
أتخبط ف حد
لحسن يعملى محضر
ويطلب تعويض
مشيت كتير يامه
بس الفرح لسه بعيد
ياترى لسه بتدعي لى؟
كل سنة وانتي في الجنة يا امي الغاليه نوال .
ابنك سيد غريب
رائعه ، رحمها الله تعالى رحمة واسعة وغفر لها وأسكنها الفردوس الأعلى من الجنة